काठमाडौं, कीर्तिपुरके पाँगास्थित बरघर रेस्टुरेण्टमे हुइल कार्यक्रममे गणेश वर्तमान, शिव शक्ति, निरज बाबु, जगत वशिष्ठ, शत्रुघन चौधरी, नन्दुराज चौधरीलगायत स्रस्टालोग रचना वाचन कर्ले रहिट । 

कार्यक्रममे बर्का पहुना नाउपाके संघीय सांसद अरुण चौधरीके कहाइ रहे, ‘मै पहिचानके मुद्दा बोकल पार्टीसे जिटल सांसद हु । मने आजकल मोरे पार्टी पहिचान छोरटि जाइटा कि, बिस्रैटि जाइटा कि कना चिन्ता लागठ ।’ उहाँ जनतनके आवाज उठाइक लग कलम चलैना स्रस्टन हरदम सम्मान कर्ना कहटि सब्जे मिल्के थारु समाज आगे बह्राइ पर्ना जरुरी रहल बटैलाँ ।

कार्यक्रममे नाउपाके कैलाली जिल्ला अध्यक्ष प्रदीप चौधरी, डा रामबहादुर चौधरी, प्रसादु थारु, गजेन्द्र दहित, सिताराम चौधरी, सरला चौधरीलगायत बोलुइयन कार्यक्रमहे निरन्तरता डेहे पर्ना सुझाव डेले रहिट । कार्यक्रम डा कृष्णराज सर्वहारीके घरगोस्याइमे हुइल रहे । 

ठुम्रार साहित्यिक बखेरी २०६९ माघसे सुरु हुइल रहे । कोरोना कालपाछे यकर श्रृंखला अनियमित बटिस ।