कार्यक्रमम थारु भाषा कला साहित्य संस्कृति ओ समाजसेवाम योगदान डिहुइया व्यक्तित्वहुकहन सम्मान कइगिल बा । सम्मानित हुइनाम संस्कृति ओ नागरिक उड्डयन मन्त्रालयमसे भाषा तथा साहित्यक विधाम प्रादेशिक प्रतिभा पुरस्कार २०८० से सम्मानित स्रष्टा वरिष्ठ साहित्यकार मान बहादुर चौधरी ‘पन्ना’ हुकिहिन् बधाई तथा सम्मान कर्ल बाटिन् । 

ओस्हख, थारु कला संस्कृति संरक्षणम टेवा पुगाइल समाजसेवी व्यक्तित्व स्वर्गीय शनिश्रा महतम दहितह मरणोपरान्त सम्मान कर्लिन् । सम्मानित हुइना अन्यम समाजसेवी थारु कल्याणकारिणी सभाके पूर्व केन्द्रीय सदस्य मानबहादुर चौधरी, मिना चौधरी, अशोक चौधरी रहल बाट  ।  

कार्यक्रमक बर्का पहुनी वीरेन्द्रनगर नगरपालिकाके नगरप्रमुख मोहनमाया ढकाल थारुनके महान राष्ट्रिय माघ पर्व हुइलक ओहर्से इहिह बचाइक लाग थारु समुदाय लागि पर्लकम खुशी व्यक्त कर्लि । उहाँ आग कलि– नेपाल विविधतायुक्त देश हो । अन्य समुदाय असक हमार समाजम रहल थारु समुदाय संस्कृतिम बहुत धनी रहलक कारन पुराना मौलिक मूल्यमान्यता, परम्पराह पुस्तान्तरण कर स्याक परठ । पुरान लोक परम्परा संस्कृति लौव पुस्ताम हस्तान्तरण हुइ नि सेक्लसे लोप हुइना सम्भावना रहठ । ओहमार असिन कार्यक्रम हुइन जरुरी हुइना जरुरी बा । 

लखागिन थारु उत्थान मञ्च, सुर्खेतके अध्यक्ष मानबहादुर चौधरी पन्ना सुर्खेतके थारु जाति कर्णाली प्रदेशके पहिचान हुइट तर माघ पर्वके लाग कर्णाली प्रदेश सरकार एवम् स्थानीय सरकारके उदासिनताके कारण विगतठेसे हर्षोल्लासपूर्वक मनाइ नि सेक्लक गुनासो व्यक्त कर्ल । सुर्खेतके थारु समुदाय सहाराविहीन टुवर नागरिक असक हरेक बरस एकठो सामान्य कार्यक्रम करक लाग वडा वडा ढाइ पर्ना स्थितिके कारण थारु अगुवा हुक्र निराश हुइपर्ना विडम्बना रहल बाट बटोइल । 

कार्यक्रमम थारु कल्याणकारिणी सभाके केन्द्रीय सदस्य कृष्ण बहादुर थारु, लखागिन थारु उत्थान मञ्च, सुर्खेतके सल्लाहकार जागुराम थारु, आदिवासी जनजाति महासंघका अध्यक्ष अशोक राजी, जनजाति महासंघका प्रदेश अध्यक्ष बिर बहादुर भोटे, कुमाल समाजक इन्द्र कुमाल लगायतके वक्ताहुक्र आपन आपन विचार व्यक्त कर्ल रलह । 

माघ मिलन कार्यक्रमम विभिन्न गाउँमसे आइल कलाकार हुक्र मेरमेरिक मघौटा नाच प्रस्तुत कर्ल रलह । थारु कल्याणकारिणी सभाके सभापति बेचुलाल चौधरीके घरगोस्याइमा हुइल कार्यक्रमम थारु कल्याण कारिणी सभाके जिल्ला उपसभापति सितल्ली चौधरी स्वागत मन्तव्य डेल रलही कलसे कार्यक्रमके सञ्चालन थारु कल्याणकारिणी सभाके सचिव डिलबहादुर चौधरीे  कर्ल रलह ।