खटोल्ना, घोर्वा,  हर्ना ओ चिरैया डारल पन्वा
हेर्टि सुहावन लागे जैसिन कजरिक बन्वा 
पुँजा बिटोर्के कसौंजा चिर्के 
बलटल सिर्जल महिनाभर बिन्के 
पस्नक मोल हो भौकक् खोल हो 
यी मोर ढकिया 
बुडि सिखाके गैलि बिनेक लाग 
चार मास लागल बिने सिखेक लाग 
कबु छेट्नार होजाए, कबु ढिंर गग्रार 
टब्फे बिना सिख्ले नाइ छोर्नु डिया बार बार
लोहेक छेड्ना अंग्रिम गर्लेक फे पटा नाइ पाँउ
ढकिया बिनेक मारे बियारेक अख्वारी जाउँ
घाम गरराके बिनल, नैहो बजारेम किनल 
यी मोर ढकिया 
दाना उठैना सजिल, कुर्कुट फेकैना फे
कल्वा डेहेजाइबेर सुघ्घर डेखैना फे 
गुल्यार गोरा, मिलल पेंडी बल्गर
हलुकमा हलुक, डल्गरमा बरा डल्गर
कोन्वम ढरो चाहे, डेहरिक भर्कनिम 
मिन्झारिम ढरो चाहे, घरेक बहरिम 
सोह बनाउ या काम लगाउ
यी मोर ढकिया
नेपाली नारीन्के शान हो
हमार संस्कृति ओ पहिचान हो
पुर्खनके डेहल बरभारी ज्ञान हो
थारु समुदायके ज्यान हो
सिपार हाँठेक पैना बयान हो
एहिन बचैना अभियान हो 
सक्कु जाने सिखे पर्ना 
सिख्के बिने पर्ना 
यी मोर ढकिया ।
यी मोर ढकिया ।।

     मधुवन–३, बर्दिया