तस्विर सौजन्यः काठमाडौं पोष्ट
कान्तिपुर दैनिक परिवारको अंगे्रजी दैनिक ‘काठमाडौं पोष्ट’का सम्पादक सञ्जीव सत्गैंयाले सोमबार पदबाट राजीनामा दिएका छन् । 
सन् २०२० फेब्रुअरीको तेस्रो साता सम्पादक नियुक्त भएका सञ्जीव सत्गैंया करीब अढाइ बर्ष ‘काठमाडौं पोष्ट’को सम्पादक रहे । दाङदेउखुरीको राप्ती गाउँपालिका–३, बसन्तापुर (बाघढढ्ढी) का स्थायी घर रहेका उनी थारु समुदायबाट ‘बिग हाउस’को दैनिक पत्रिकामा सम्पादक हुने पहिलो शौभाग्य पाएका थिए । सो पदमा अब थारु पत्रकार शायदै पुग्लान् ।
थारु सम्बद्ध कार्यक्रममा सहभागी नहुने तथा सत्गैंया पछि थारु नलेख्नाले उनी थारु समुदायको भएको कमैले थाहा पाएका थिए । थारु पत्रकार संघ नेपालका संस्थापक महासचिव तथा पूर्व अध्यक्ष कृष्णराज सर्वहारीका अनुसार उनी थारु पत्रकार संघ नेपालका संस्थापक सदस्य थिए । यद्यपि संस्था दर्ताको क्रममा समय दिन नसक्दा प्राविधिक रुपले उनको नाम रहेन ।
सत्गैंयाले प्रकाशक कैलाश सिरोहिया, आफ्नो समाचार कक्ष, कान्तिपुर दैनिकका सम्पादक उमेश चौहान, प्रधान सम्पादक सुधीर शर्मालाई सहकार्यका लागि धन्यवाद दिदै ट्वीटरमा लेखेका छन्, ‘विगत अढाइ वर्ष ‘काठमाडौं पोष्ट’को सम्पादकको रुपमा उत्साहजनक र मिठासपूर्ण समय रह्यो । 
दुइ दशकअघि सन् २००२ मा ‘द हिमालयन टाइम्स’दैनिकबाट पत्रकारिताको करियर सुरु गरेका ४७ वर्षिय सत्गैंया ‘द रिपब्लिका दैनिक’मा पनि आवद्ध थिए । ‘काठमाडौं पोष्ट’को सम्पादकमा भदौ २० बाट विश्वास बराल आएका छन् ।