कैलालीको कैलारी गाउँपालिकाले एक सय दिनको उपलब्धि सार्वजनिक गरेको छ । मंगलबार एक कार्यक्रमका बिच उपलब्धि सार्वजनिक गर्ने क्रममा गाउँपालिकाका अध्यक्ष राजसमझ चौधरीले मालपोत समायोजनदेखि रक्त संचार केन्द्रसँगको सहकार्यमा कैलारी गाउँपालिकाबासीलाई निःशुल्क रगतको उपलब्ध गराउनेसम्मको उपलब्धि सुनाए । 
मालपोत दरमा समायोजन, सुत्केरीलाई निःशुल्क एम्बुलेन्स गाउँपालिका बाहिर जिल्लाभित्र जन्मदर्ता प्रोत्साहन कार्यक्रम संचालन, नदी नियन्त्रण तथा तटबन्धनका कार्यक्रम संचालन, पुलहरुको मर्मत सम्भार, कैलारी गाउँपालिकाका सडकको मर्मत सम्भार लक्कड, बन्दरगौह्री तथा सिमरानाको झोलेंगु पुल निर्माण सम्पन्न गरेको छ । 
त्यस्तै १५ सैयाको अस्पताल निमार्णका लागि सम्झौता तथा योजना कार्यान्वयन प्रक्रियामा, स्वास्थ्य शाखाबाट विभिन्न स्वास्थ्य शिविर संचालन, धनगढी नेत्रालयसंगको सहकार्यमा आँखा शिविर संचालन, विपतपुर गाउँका आगलागी पीडितको २२ वटा घर निर्माणदेखि पीडितलाई निःशुल्क विद्युत मिटर जडान रहेको छ । 
त्यस्तै गाउँपालिकाको समन्वयमा शिवरत्नपुरमा राहत वितरण, पशु स्वास्थ्य शिविर संचालन, धानवालीको राहत वितरणका लागि समन्वय तथा सहजीकरण, वडा ६ र ९ का कृषक समूहलाई कृषि कार्यका लागि २५÷२५ लाख अनुदान, पकेट कार्यक्रम संचालनका लागि वडा छनौट, संचालित कार्यक्रमहरुको सघन अनुगमन लगायत उपलब्धि रहेको सार्वजनिक गरियो । 
यस अघि जेष्ठ नागरिकले सामाजिक सुरक्षा भत्ता लिन बैंकमा जानुपर्ने बाध्यता रहेकोमा हाल वडा कार्यालयबाट सामाजिक सुरक्षा भत्ता वितरण गरिएको, मिनी रंगशाला, वीपी पार्क डिपिआर निर्माण, विद्यालयको सघन अनुगमन, विद्यालय भवन निर्माण लगायतका लागि कार्यदल गठन, संघीय तथा प्रदेश सरकारसंगको समन्वयमा थप बजेट तथा कार्यक्रमको सुनिश्चिता गरिएको बताइएको छ ।  
गाउँपालिका अध्यक्ष राजसमझ चौधरीले गाउँपालिकाको गतिविधि त्रैमासिक रुपमा सार्वजनिक गर्ने बताए । गाउँपालिका उपाध्यक्ष भगवतीकुमारी चौधरी मालपोत दरमा समायोजन गर्दा गाउँपालिकावासी खुशी भएको बताइन् । 
गाउँपालिकाको एक सय दिनको उपलब्धि सार्वजनिकीकरण कार्यक्रममा प्रमुख प्रशासकीय अधिकृत वीरबहादुर ऐर, वडाध्यक्षहरु, कार्यपालिका सदस्य, कर्मचारीहरु सहभागी थिए ।