आदिवासी जनजाति आयोगले आगामी संसदीय निर्वाचनमा आदिवासी जनजातिहरुको प्रतिनिधित्व सुनिश्चित गर्न पार्टी र निर्वाचन आयोगको ध्यानाकर्षण गराएको छ । 
मंगलबार आयोगले ललितपुर, पुल्चोकस्थित आयोगको कार्यालयमा पत्रकार सम्मेलन गरी राजनीतिक दललाई उम्मेदवार मनोनयन गर्दा संविधानको मर्म र भावनाअनुरूप आदिवासी जनजाति समुदायको प्रतिनिधित्व गर्न ध्यानाकर्षण गराएको हो । 
आयोगले निर्वाचन आयोगलाई पनि संविधानको मर्म र भावना समानुपातिक समावेशी प्रतिनिधित्व रहेको भन्दै आदिवासी जनजाति समुदायको प्रतिनिधित्व सुनिश्चित हुने खालको नीति अवलम्बन गर्न ध्यानाकर्षण गराएको छ । 
पत्रकार सम्मेलनमा आयोगका अध्यक्ष रामबहादुर थापा मगरले संवैधानिक तथा कानूनी प्रावधानको व्यवस्था, मर्म र भावनाअनुसार आदिवासी जनजातिको समानुपातिक समावेशी प्रतिनिधित्वको सवालमा राजनीतिक दल र निर्वाचन आयोगले गम्भीरता लिनुपर्ने बताए ।
संविधानको मर्म र भावनाअनुसार दलित तथा महिलाको प्रतिनिधित्व वडास्तरबाटै सुनिश्चित गरिएता पनि आदिवासी जनजातिको प्रतिनिधित्व सुनिश्चित हुन नसक्नु दुःख रहेको अध्यक्ष थापाको भनाइ थियो । 
आयोगले पत्रकार सम्मेलनमार्फत जारी गरेको प्रेस विज्ञप्तिमा समानुपातिक समावेशीताको सिद्धान्तलाई अनदेखा गरी उम्मेदवार चयनमा त्रुटि भएमा आदिवासी जनजाति समुदाय राजनीतिक अधिकारबाट बञ्चित हुने भएको भन्दै यसप्रति गम्भीर हुन राजनीतिक दल र निर्वाचन आयोगसँग आग्रह गरेको छ ।