बुधबार प्रतिनिधिसभा बैठकमा बोल्दै ढकालले जनताले पत्याएको एउटा निर्दोष व्यक्तिलाई जेलमा राखेर निर्वाचन गर्नु न्यायसंगत नहुने तर्क उनको थियो ।
उनले निर्वाचनअगावै चौधरीको रिहाइको माग समेत गरिन् । रेशम निर्दोष छन्, उनका विचार र नेतृत्वमा देशमा एउटा लहरै आइरहेको सन्दर्भमा उनलाई जेलभित्रै राखेर निर्वाचन गरिरहनु कत्तिको न्यायसंगत होला  ? सांसद ढकालको सोधाइ थियो । उनले भनिन्, ‘आगामी मंसिर ४ को निर्वाचन अगावै उहाँको रिहाइका लागि सम्माननीय सभामुखज्यूमार्फत् नेपाल सरकारसँग आग्रह गर्न चाहन्छु ।’ 
आमनेपालीको संघर्ष र बलिदानको प्रतिफलमा आएको गणतन्त्रमा केही तुषहरू बाँकी नै रहेको बताउँदै ढकालले गणतन्त्र सबै जातजाति र वर्गका नागरिकको अधिकार सुनिश्चित गर्न ल्याइएको जिकिर गरिन् । उनले गणतन्त्र  रेशम चौधरीजस्ता व्यक्तिलाई विना कुनै दोष जेलमा सडाउनका लागि नल्याइएको जिकिर गरिन् । 
निर्वाचनमा सेटिङ गरेर मात्रै जित्ने अवस्थामा पुगेका राजनीतिक दलहरूका लागि चौधरीले चुनौती दिएको उनको भनाइ थियो । 
ढकालले  रेशम चौधरीलाई दोषी करार गरेर जेल पठाउने अदालतको फैसलाबारे केही भन्न नचाहने विचार राख्दै महाभियोग लगाएका प्रधानन्यायधीशले न्यायालय निष्पक्ष छैन र कतिपय न्यायधीशहरू राजनीतिक नेताहरूका प्रभावमा परेर फैसला गर्छन् भनेर संसदीय समितिमा बोलेको कुराभित्र धेरै अर्थ रहेको जिकिर गरिन् । 
त्यस्तै, अर्की सांसद पार्वती डिसी चौधरीले थारूको छोरो भएकै कारण  रेशम चौधरीलाई जेलमा राखेको आरोप लगाउँदै तुरुन्त रिहाइको माग राखिन् ।
स्मरण रहोस्, काठमाडौंको रिपोर्टस् क्लबमा भदौ १६ गते नागरिक उन्मुक्ति पार्टीले पार्टी प्रवेशको कार्यक्रम राखेकोमा सांसद नरमाया ढकाल पनि पार्टी प्रवेश गर्ने कार्यक्रम थियो । उनको नाम उद्घोष पनि गरिएको थियो तर उनी अनुपस्थित रहिन् ।