वागमती प्रदेश मन्त्रिपरिषद्को सोमबार भदौ २७ गते बसेको बैठकले वागमती प्रदेशभित्र नेवार (नेपाल) तथा तामाङ भाषालाई सरकारी कामकाजको भाषा बनाउने प्रक्रिया अघि बढाउने निर्णय गरेको छ । 
प्रदेशको सामाजिक विकासमन्त्री कुमारी मुक्तानले नेवार समुदायको नेपाल भाषा र तामाङ भाषालाई सरकारी कामकाजी भाषा बनाउने प्रक्रिया अगाडि बढाउने निर्णय भएको जनाइन् । 
वागमती प्रदेशमा करिब १८ प्रतिशतले तामाङ तथा १२ प्रतिशतले नेवार बोल्ने गरेका छन् । 
भाषा आयोगको प्रतिवेदनमा वागमतीसहित देशका सातै प्रदेशमा नेपालीबाहेकका ११ वटा भाषालाई सरकारी कामकाजको भाषाको रुपमा सिफारिस गरिएको आयोगका सदस्य अमृत योञ्जन तामाङले जनाए । सोही सिफारिश अनुसार वागमतीमा तामाङ तथा नेवार दुई भाषा लागु गर्न थालिएको हो । 
लुम्विनी तथा सुदूरपश्चिममा थारु भाषा लागु गर्न भाषा आयोगले सिफारिस गरे पनि यी दुवै प्रदेशले कुनै ठोस निर्णय गरेका छैनन् ।