हमार आन्डोलन लुहाकअस अरगर हुइटि जाइटा
मल ओ पानी पाइल धानअस फरगर हुइटि जाइटा

पैल्ह डुर डुर कटि भगुइयन जो लग्गु लग्गु आइ लग्ल
मैल छुटल उहमार झन् जोरसे डरगर हुइटि जाइटा

किरा काँटि लग्ना कलक लरम उ फुलम केल्हि हो
मिर्चा छिपल नि पटिना  अस झरगर हुइटि जाइटा

आप रुइ नि परि डाइ टुहिन, नि रुइ परि बाबा टुहिन
हमा नेङ्लक डगर लड्याअस सरगर हुइटि जाइटा ।

२

बुढ्यार मनै असिन सँस्छ्वार बन नि सेक्बो
क्वारम लेके ढिरसे कलो म्वार बन नि सेक्बो

टुहिन ट मै मजा मनै सोच् रख्नु फुरसे हो
म्वार मन चोर्क बरभार च्वार बन नि सेक्बो

मै लुहाक हुइटु टुँ माटी पटा हुइ जे टुहिन
लुहाक लुहाकसे ज्वाँटट् ज्वार बन नि सेक्बो

जाउ जाउ उहँ जाउ जहाँ बा टुहाँर खुसि
छोर डेउ टुँ म्वार खुसिक ड्वार बन नि सेक्बो ।

३

छावा भुँख्ल बा कि, अघ्घाइल ? डाइ कठि
लुगाबार कट्वा पाक डुख पाइल डाइ कठि

 टुँ पो डिनभर डारु पिक सन्झ्या  पसर रठो,
का हुइलिस  छावा, नस्से खोँखाइल डाइ कठि

जन्निह मौररि डिह नि सेक्क राटभर भर रुइट,
छावा म्वा मैयाँ लाग्क आँस चुहाइल डाइ कठि

आपन माउँ ह समझ्क अँट्वम बैसल रह उ,
छावा महि समझ्क सज्ना गाइल डाइ कठि

म्वार भाग्य ओसहँ होक डुख पैलक हुइटु फुरसे,
नि कि छावक मन नि हुइस कट्कटाइल डाइ कठि ।