काँग्रेस भित्र उम्मेदवार सिफारिसमा विवाद चलिरहँदा प्रतिनिधि सभा सदस्यतर्फको ११० जना समानुपातिक उम्मेदवारको बन्दसूची सार्वजनिक भएको हो ।

जसमा नेता विमलेन्द्र निधि पहिलो नम्बरमा छन् । सूचीमा प्रधानमन्त्री पत्नी आरजु राणा देउवा, गृहमन्त्री बालकृष्ण खाँणकी पत्नी मञ्जु खाँण पनि समावेश भएकी छिन् ।

यसैबीच थारु कोटाबाट ६ जनाको नाम समावेश भएको छ । दाङ देउखुरीका योगेन्द्र चौधरी र सुनसरीकी कल्पना चौधरी, नवलपरासीकी विना कुमारी थनेत परेका छन् भने कैलाली जिल्लाका ३ जनाको नाम समावेश छ । कैलालीबाट समावेश हुनेमा खेम डंगौरा चौधरी, रामकुमारी चौधरी र जीवन राना रहेकी छन् । 

सूचीमा योगेन्द्र चौधरी ९५औं नम्बरमा छन् । तर उनी थारु कोटाबाट एक नम्बरमा रहेको बुझिएको छ ।सूचीको ९८ औं नम्बरमा रहेका कांग्रेस कैलाली उपसभापति समेत रहेका डंगौरा चौधरी थारु कोटाको दोस्रो नम्बरमा छन् ।

थारु कोटामा ४ सिट पर्ने भएपनि सो सूचीमा ६ जना थारु सामुदायबाट नाम समावेश भएको छ । जिल्ला उपसभापति डंगौरा चौधरीले सूचीमा अझै हेरफेर हुन सक्ने सम्भावना रहेको बताए ।