कैलालीको लम्कीमा बुधबार आयोजित पार्टी प्रवेश तथा भेटघाट कार्यक्रममा उनी नेपालीको घर आँगनमा भित्रिसकेको दशैं र दशैंमा हुने उल्लास र रौनकतालाई स्मरण गर्दै भाव विह्ल भइन् ।

श्रीमान रेशम चौधरीसहित घर परिवारसँगै दशैं मनाउन पाउने आशाभाव पोख्दै भनिन्, ‘धेरै कुरा भन्न चाहान्न । दशैं घर आँगनमै पुगिसकेको रहेछ । तपाईहरुको बुवा, छोरा पनि दशैं मनाउन घर पुगिसकेका होलान् । पुग्दै होलान् । मलाई पनि लाग्छ, मेरो श्रीमान पनि दशैं मनाउन घर आएको भए मलाई कस्तो अनुभूति हुन्थ्यो ? जो–जो कारागारमा छन्, उनीहरु पनि घर आएको भए उनीहरुका घर परिवारमा कस्तो खुशयालीको माहोल हुन्थ्यो । सबै जना बाटो कुरेर बसेका छौ आजभोलि ।’

उनले २०७२ मा संविधान बनिरहँदा आफुहरु पनि यो देशको नागरिक भएकोले पहिचान र अधिकार चाहियो भनिरहँदा आफूमाथि राज्यबाट चरम दमन र अत्याचार भएको उल्लेख गरिन् । त्यो दमन र अत्याचार सहेर बस्न बाध्य भएको बताउँदै त्यसैको उन्मुक्तिको लागि नागरिक उन्मुक्ति पार्टी गठन भएको उनले स्पष्ट पारिन् ।

उनले आफ्ना आफन्तजनसँग यो दशैं मनाउँन नपाए पनि आउँदो माघी भने अवश्य पनि घरमै मनाउने आशा व्यक्त गरिन् । टीकापुर घटनाका जेलबन्दीहरु घर आउनेमा विश्वास पनि दिलाइन् । जसको लागि आउँदो मंसिरमा मतदाताको साथ चाहिने आशा राखिन् ।

‘गएको पुसमा दर्ता भएको पार्टी आज कैलालीको सबैभन्दा ठूलो पार्टी बन्न सफल भएको छ । आउँदो मंसिरमा हामीलाई भोट दिइ राष्ट्रिय पार्टी बन्न सहयोग गर्नुस्’, उनले अगाडि भनिन् ‘हामीलाई ढकिया चिन्हमा भोट दिएर जिताउनुस् । म एउटा बचन दिन चाहान्छु, । यो दशैंमा हुँदैन होला । आउँदो माघी जसरी पनि आफ्नो घर परिवारसँगै मनाउने बाटो बनाइदिनुस् ।’