सुनसरी–३ बाट उम्मेदवार भएका उनले अब आफू जिल्लामै जिन्दगी बताउने बताएका छन् । यसअघि अबको प्रधानमन्त्री थारुको छोरा हुने अभिव्यक्ति उनको मुखारविन्दबाट आउन छाडेको छ । गच्छदार सुनसरी–३ बाट एमालेकी भगवती चौधरीसंग तेश्रो पटक भिड्दै छन् ।

‘नेपाली काँगे्रस सुनसरी क्षेत्र नम्बर ३ मा विजय कुमार गच्छदारलाई विजय गरौं’ फेसबुक पेजमा गच्छदारको अभिव्यक्ति आएको छ, ‘मेरो सपना डक्टर बन्ने थियो । पढ्दा पढ्दै २०२७ सालमा  पञ्चायतले जेल हाल्यो, त्यसपछि डाक्टर बस्ने सपना तुहियो । जिन्दगी राजनिति तर्फ मोडियो,   धेरै उतार चढावहरु आए  राजनीतिक जीवनमा,   म आवाज बिहिनहरुको आवाज बन्न पुगे ।’

गच्छदारले भनेका छन्, ‘दलित, मधेसी,  थारु, महिला, मुस्लिमलगायत सामाजिक रुपमा  पिछडिएका बर्ग समुदाय हरुको  लागि बुलन्द आवाज उठाउदै गएँ,  हक अधिकारहरु स्थापित गर्दै गएँ ।  ५०÷५५ वर्षको मेरो राजनीतिक जीवनमा ०४८ सालदेखि ०७४ सम्म ६ पटक सासद बनेँ,  मन्त्री बने ।  यस क्षेत्रको लागि बिजुली,  सडकबाटो,   पुल,  विद्यालय,   बिभिन्न  संस्थानका अफिसहरु लगायत धेरै क्षेत्रमा काम गरेको छु ।’

गच्छदारले अगाडि भनेका छन्, ‘अब  सातौं  पटक जनताले जिताउने छन्, म ढुक्क छु । तर अब म जितेर  मन्त्री बन्न सिंहदरबार  जाँदिन ।  मलाई भेट्न काठमाडौं आउनुपर्ने छैन । जीवनको अन्तिम सास तपाईंहरु सँगै बिताउन चाहन्छु ।  यहीको  जनताको  झुपडीमा मेरो  सिंहदरबार हुनेछ,  दुःख सुख साथै रहने छ ।  धामी झाँक्री,  भाला गोली,  सिरक ब्रिफकेस मसँग छैन ।  मसँग केवल तपाईंहरुको स्नेह, माया र विश्वासको नजर छ, चुनाव जित्ने मेरो यही आधार छ ।’

गच्छदारका प्रतिद्वन्द्वी भगवती चौधरीले केही साता अघि यसपाली विपक्षीसँग भाला, गोली प्रयोग गरेर भए पनि जित्ने उद्घोष गरेकी थिइन् । यसबारे निर्वाचन आयोगले उनीसंग स्पष्टीकरण लिएको थियो ।

गच्छदारले चुनाव जितेपछि संसदमा सपथ लिन पाउँदैनन् भन्ने आधारहीन तर्क रहेको गच्छदारले बताएका छन् । संघीय चुनावमा लगातार ६ पटक विजयी भएर सातौं पटक लड्ने प्रधानमन्त्री शेरबहादुर र गच्छदार मात्र हुन् ।

यसअघि भगवती चौधरीसंग दुइ पटक चुनाव लडेका गच्छदार झिनो अन्तरले जितेका थिए, पछिल्लो चुनावलाई उनले जीवनकै कठिन परीक्षा भनेका थिए । गठबन्धनका कारण गच्छदार यसपाली चुनाव जित्नेमा ढुक्क छन् ।