जब ,

नेताले टालिएको भोटोलाई

खोज्दै आएर नमन गर्छन्

कुच्चिएको कालो

सिलावरको डेक्चीमा

आलु ताछ्दै भान्सामा भेट्टिन्छन्

कतै हलो जोत्दै खेतमा

कतै मकै गोड्दै बारीमा

तब,

ए, धौलीका बाहरु ,

तिमीहरू यत्ति कुरा जरुर बुझ्नु

उनीहरू हामीलाई

एक चोक नचाएर

एक छाक खुवाएर

र,

एक फाँक हँसाएर

पाँच वर्ष हामीलाई रुवाउन आएका हुन् ।

...

चाहे कोही

दार्चुलामा आएर

गुमेको जमिन फिर्ता गर्छु भनेर

कालीतिर जतिसुकै भुकोस्

चाहे कोही

ताप्लेजुङमा आएर

वृद्धभत्ता बढाउँछु भनेर

मेचीतिर जतिसुकै कराओस्

ए, धौलीका बाहरु ,

तिमीहरू यत्ति कुरा जरुर सम्झ्नु

उनीहरू हाम्रा खोरहरुमाथि

गिद्दे नजर लाउन आएका हुन्

भरे चल्लो चोर्नलाई

उनीहरू हाम्रा बालीहरुमाथि

कर्के नजर लाउन आएका हुन्

भरे अन्न खोस्नलाई ।

                 धनगढी, कैलाली