मसित

तिमीलाई दिन केही छैन ।

आदर्श छ भनूँ भने

दलाली गरेर

आफू र आफ्नो इमान बेच्ने समय हो ।

इमान छ भनूँ भने

न ग्यास उधारोमा दिन्छ

न भोक सित्तैमा पाक्छ

भोक छ भनूँ भने

न भोक भोकलाई साथ दिन्छ

न क्रान्ति विना भोक सफल हुन्छ

क्रान्ति छ भनूँ भने

न क्रान्तिकारी क्रान्तिको पक्षमा हुन्छ

न क्रान्ति र क्रान्तिकारी सङ्गै हुन्छ

म यथास्थितिमा बाँच्न सक्दिन

तिमी भोकै बाँच्न सक्दैनौ

क्रान्तिकारीहरू

क्रान्तिको विपक्षमा हतियार उठाइरहेको

वर्तमान परिप्रेक्षमा

क्रान्तिकारीहरू नै क्रान्तिकारीमाथि

मिसाइल बर्साइरहेको बेला

मसित

के छ भनूँ र दिऊँ तिमीलाई ?

कि नम्बर उल्लेख गर्दै लेखेर दिऊँ

भ्रष्टहरूले झैँ घोषणापत्र

र, दिऊँ शतप्रतिशत ग्यारेन्टी ?

                           भक्तपुर