दाङ–१ क बाट नेकपा माओवादी केन्द्रका उम्मेदवार इन्द्रजीत थारु १ हजार ७ सय ७५ मतान्तरले निर्वाचित भएका छन् ।

सत्ता गठबन्धनबाट उम्मेदवारी दिएका थारुले एमालेका उम्मेदवार गंगाराम भट्टराईलाई पराजित गरेका छन् । लुम्बिनी प्रदेशका बहालवाला स्वास्थ्य मन्त्री थारु दोस्रो पटक प्रदेश सभा सांसदमा निर्वाचित भएका हुन् ।  

थारुले १३ हजार ५०५ मत ल्याएर विजयी भएका छन् भने भट्टराई  ११ हजार ७३० मत ल्याएर पराजित भएका छन् । २०७४ सालको चुनाव यसै प्रदेश सभाबाट थारु निर्वाचित भएका थिए ।

तर २०७० सालको चुनावमा मोहन वैद्य नेतृत्वको माओवादीमा सहभागी भई चुनाव बहिस्कारमा सहभागी भएका थिए । पछि प्रचण्ड नेतृत्वको माओवादीमा सहभागी भएपछि २ पटक प्रदेश सभा सांसदमा निर्वाचित हुन सफल भएका छन् ।

पहिलो संविधान सभा २०६४ सालमा उनी क्षेत्र नम्बर १ बाट तत्कालीन कांग्रेस नेता खुमबहादुर खड्कालाई पराजित गर्दै थारु निर्वाचित भएका थिए । संयोग कस्तो परेको छ भने इन्द्रजीत थारु  दाङ–१ क बाट निर्वाचित भएकोमा  दाङ–१ ख बाट प्रदेश सभामा खुमबहादुर खड्काका छोरा अनुराग खड्का विजयी भएका छन् ।