सुनसरी–३ मा गच्छदारलाई हराएर एमालेकी भगवती चौधरी निर्वाचित भएकी छिन् । उनले ४० हजार ७८८ मत पाइन् । उनका निकटतम प्रतिद्वन्द्वी नेपाली काँग्रेसका विजयकुमार गच्छदारले ३५ हजार ६०० मत पाए ।

यो हारसँगै संसदीय राजनीतिका अनुभवी खेलाडी विजयकुमार गच्छदार पहिलो पटक संसद पुग्न असफल भएका छन् । २०४८ यताका सबै संसदमा निर्वाचित भएर सक्रिय भूमिकामा रहेका गच्छदार आउने प्रतिनिधिसभामा भने देखिने छैनन् । 

लगातार सात पल्ट चुनाव जित्ने गच्छदारको इतिहासमा ब्रेक लाग्न पुगेको छ । लगातार सात पल्ट चुनाव जित्ने रेकर्ड अब शेरबहादुर देउवाको मात्रै रहने भएको छ । 

हालै सम्पन्न काँग्रेस पार्टीको महाधिवेशनमा धनराज गुरुङसँग मात्र २ भोटको अन्तरले उपाध्यक्षमा हारेपछि गच्छदारको हारको दिनगन्ती सुरु भैसकेको थियो । अब पार्टीमा उनको पकड निकै कमजोर हुने देखिन्छ । राजनीतिमा गच्छदार युगको अन्त्य भएको छ भन्दा फरक परोइन । 

एमाले नेतृ भगवती चौधरीलाई पछिल्लो दुई निर्वाचनमा झिनो मतले पराजित गरेका गच्छदार उनै चौधरीसँग यो पटकको निर्वाचनमा पराजित भएका हुन् ।

चौधरीलाई २०७० मा भएको दोस्रो संविधानसभामा ३६२ मतले र पछिल्लो २०७४ को निर्वाचनमा ३२१ मतले गच्छदारले पराजित गरेका थिए । तर, यो पटक भने भगवतीले गच्छदारलाई ५ हजार १८८ बढी मतान्तरले पछारेकी छिन् ।

हालसम्मको गच्छदारको चुनावी नतिजा

२०४८ – सुनसरी क्षेत्र नम्बर २

विजयकुमार गच्छदार (नेपाली कांग्रेस) : २७,७७५

लिला श्रेष्ठ (नेकपा एमाले) : १५,८८५

मतान्तर : ११,८९०

२०५१ – सुनसरी क्षेत्र नम्बर २

विजयकुमार गच्छदार (नेपाली कांग्रेस) : २१,९६३

कुलदिप पेसकर (नेकपा एमाले) : १०,७०८

मतान्तर : ११,२५५

२०५६ – सुनसरी क्षेत्र नम्बर २

विजयकुमार गच्छदार (नेपाली कांग्रेस) : २७,५२७

रेवतीरमण भण्डारी (नेकपा एमाले) : २३,३३९

मतान्तर : ४,१८८

२०६४ – सुनसरी क्षेत्र नम्बर ३

विजयकुमार गच्छदार (मधेशी जनअधिकार फोरम) : २३,७६९

अगमलाल चौधरी (नेपाली कांग्रेस) : १०,८०६

मतान्तर : १२,९६३

२०७० – सुनसरी क्षेत्र नम्बर ३

विजयकुमार गच्छदार (फोरम लोकतान्त्रिक) : १७,५२४

भगवती चौधरी (नेकपा एमाले) : १७,१६२

मतान्तर : ३६२

२०७४ – सुनसरी क्षेत्र नम्बर ३

विजयकुमार गच्छदार (नेपाली कांग्रेस) : ३८,९७२

भगवती चौधरी (नेकपा एमाले) : ३८,६५१

मतान्तर : ३२१

२०७९ – सुनसरी क्षेत्र नम्बर ३

भगवती चौधरी (नेकपा एमाले) : ४०,७८८

विजयकुमार गच्छदार (नेपाली कांग्रेस) : ३५,६००

मतान्तर : ५,१८८

को हुन् भगवती चौधरी ?

परिवारमा कान्छी छोरीको रुपमा भगवती निम्न वर्गीय परिवारमा गढी–२, औरावनी सुनसरीमा जन्मिएकी हुन् । दाङदेउखुरी नर्तीका दिनेश चौधरीसँग उनको विवाह भएको थियो । चौधरीको एम्बुलेन्स दुर्घटनामा निधन भैसकेको छ । उनको एक छोरा छन् । 

त्रिभुवन विश्वविद्यालयबाट मानविकी तथा व्यवस्थापन विषयमा स्नातकोत्तरसम्मको अध्ययन गरेकी चौधरी फरवार्ड लघुवित्त मार्फत महिलाको आर्थिक तथा सामाजिक विकासमा लागेकी छन् । उनी यस संस्थाको संंस्थापक हुन् । फरवार्ड लघुवित्त नेपालको सबैभन्दा ठूलो लघुवित्त मानिन्छ ।

अखिल नेपाल महिला संघको राजनीतिबाट एमालेको राजनीतिमा आएकी उनी अहिले  एमालेको केन्द्रीय सदस्य तथा सुनसरी जिल्ला सहइन्चार्ज छिन् । जिल्लाको इन्चार्ज नपाएकोमा उनले पार्टी अध्यक्ष केपी ओलीको खरो टिप्पणी गरेकी थिइन् ।

उनी २०६४ सालको पहिलो संविधानसभामा समानुपातिक सदस्य हुँदै वन तथा भूसंरक्षण राज्यमन्त्री समेत भएकी थिइन् ।