उसले अध्यादेश कार्यान्वयनका लागि दबावमूलक कार्यक्रम पनि सार्वजनिक गरेको छ । थारु कल्याणकारिणी सभा एवं थरुहट, थारुवान संयुक्त सघर्ष समितिले मंगलबार रिपोर्टस क्लबमा पत्रकार सम्मेलन गरी अध्यादेश कार्यान्वयन नभए आन्दोलन गर्ने चेतावनी दिएको हो ।

सभाले मंगलबार एक विज्ञप्ति जारी गरी सरकारलाई अध्यादेश ल्याएकामा धन्यवाद दिँदै राष्ट्रपतिबाट जारी हुने विश्वास व्यक्त गरेको छ । ‘यसलाई कहिँ कतैबाट जान अञ्जानमा गरिएको विरोधको सामना गर्दै मौलिक हक अधिकार प्राप्तिको लागि जोडदार माग गर्दछौं । साथै  मन्त्रिपरिषदले ल्याएको अध्यादेश सम्माननीय राष्ट्रपतिज्यूबाट यथाशीघ्र प्रमाणीकरण गरिनेछ भन्ने विश्वासमा छौं’ केन्द्रीय अध्यक्ष धनीराम चौधरीले जारी गरेको विज्ञप्तिमा उल्लेख छ ।

थारु कल्याणकारिणी सभाका अध्यक्ष एवं थरुहट, थारुवान संयुक्त संघर्ष समितिका संयोजक धनिराम चौधरीले अधिकार प्राप्तको आन्दोलनलाई राज्‍यले विभेद गरेर आपराधिक बनाएको भन्‍दै यसलाई सद्भावपूर्ण ढंगले नटुंग्याए थप विद्रोह निम्‍तिने बताए ।

उनले भने, ‘थारूहरुले अधिकार प्राप्तीको आन्दोलन गर्दा अपराधीको बिल्ला भिराएर फसाउने राज्‍य र केही नश्लवादीहरुले यदि यसरी नै सद्भाव भड्काउने हो भने थारूले थप विद्रोहको आगो बोक्न तयार रहन्छ । हामी सशक्त आन्दोलनको तयारी गर्न बाध्य हुन्छौं ।’

कार्यक्रममा नागरिक उन्मुक्ति पार्टीका नेता लक्ष्मण थारुले पनि उक्त अध्यादेश राष्ट्रपतिबाट जस्ताको त्यस्तै यथाशक्य चाँडो जारी हुनुपर्ने बताए । उनले नागरिक उन्मुक्ति पार्टी सरकारमा जाने वा नजाने, सरकारलाई समर्थन वा नगर्ने विषय अध्यादेशसँग जोडिएको विषय नभएको पनि दावी गरे ।

नेपाली कांग्रेसका केन्द्रीय सदस्य योगेन्द्र चौधरीले यसअघि एमाले अध्यक्ष केपी शर्मा ओली नेतृत्वको सरकारले गरेको सहमति अनुसार अहिलेको सरकारले अध्यादेश ल्याएको बताए । उनले अहिले संसद् नभएको बेलामा सरकारले अध्यादेश ल्याएको भन्दै आलोचना गर्नुपर्ने कुनै कारण नभएको जिकिर गरे । 

कांग्रेसका अर्का केन्द्रीय सदस्य रामजनम चौधरीले थारुहरुले आफ्नो अधिकार र पहिचान स्थापित गराउन आन्दोलन गरेको बताए । आन्दोलनको क्रममा सबै जातिले आफ्नो अधिकार संविधानमा लेखाउन लागिपरेको सुनाउँदै उनले भने, ‘टीकापुर घट्ना दुर्भाग्यपूर्ण भयो । घटनाको भोलिपल्ट राज्यले थारुहरुको घरमा आगो लगाउने काम गर्‍यो ।’

नेकपा माओवादी केन्द्रका पोलिटब्यूरो सदस्य  सन्तकुमार थारुले पनि अध्यादेशको स्वागत गरे । उनले टीकापुरमा घटनामा तत्कालीन सरकारले थारुहरुमाथि थुप्रै झुटा मुद्दा लगाएको भन्दै त्यसलाई खारेज गर्नुपर्ने र जेलमा रहेकाहरुको रिहाइ हुनुपर्ने बताए ।

थाकसले बुधबार मंसिर २८ गते थरुहटका सबै जिल्लामा अध्यादेशको पक्षमा जनपरिचालन र र्याली तथा मंसिर २८ गते दिउँसो १ बजे काठमाडौंको माइतीघर मण्डलामा  अध्यादेश कार्यान्वयनको पक्षमा धर्ना, जुलुस गर्ने जनाएको छ ।