मंसिर ४ गते भएको पदेश सभा सदस्य निर्वाचनमा निर्वाचित प्रदेश सभा सदस्यहरुको लागि शुक्रबार शपथ ग्रहण कार्यक्रम राखिएको थियो ।

प्रदेश सभा सचिवालयका कर्मचारीहरु १० बजे नै पुगिसकेका थिए । शपथ ग्रहणको लागि दिउँसो १ः३५ बजेको समय निर्धारण गरिएको थियो । तर निर्धारित समयभन्दा १ घण्टा पहिलेदेखि नै नवनिर्वाचित प्रदेश सभा सदस्य, तिनका सहयोगी र शुभेच्छुकहरुले प्रदेश सभा परिसर भरियो । अनि सुरु भयो बधाइ ज्ञापन र फोटो सेसन ।

अधिकांश प्रदेश सभा सदस्य दौरा सुरुवाल, कोटसहित नेपाली टोपीमा ठाटिएर, त कोही साडीमा सजिएर पुगेका थिए । तथापि आफ्नै परम्परागत पोषकमा ठाटिएर पुगेका प्रदेश सभा सदस्यतिर सबैको ध्यान एकाएक खिचियो । उनीहरुको फोटो लिने र बधाइ दिनेहरुको भिड भने बेग्लै देखिन्थ्यो । हेर्नलायक नै थियो ।

नागरिक उन्मुक्तिबाट निर्वाचित प्रदेश सदस्य रामेश्वर चौधरी, लक्ष्मण किशोर चौधरी, कैलाश चौधरी, घनश्याम चौधरी, खुशीराम चौधरीले आफ्नै मौलिक पोषाक सेतो धोती, खुट्टामा काठको पौवा, टाउको परम्परागत टोपीमा ठाटिएका थिए । उनीहरु प्रदेश सभा परिसरमामा पाइला टेक्ने बित्तिकै सबैको केन्द्र बिन्दुमा रहे ।

नेपाली कांग्रेसकी समानुपातिक प्रदेश सभा सदस्य गीता कुमारी चौधरीको फोटो लिनेहरुको भिड पनि कम थिएन । उसै पनि ढपक्क बलेको सुन्दर अनुहार, त्यसैमाथि आफ्नै मौलिक पोषाक लेहंगा, चोलिया, घाँटी र सिउँदोभरि चाँदीका गरगहना र त्यसमाथि कोटमा सजिएकी उनी परिसरमा उभिने बित्तिकै पत्रकार र आगन्तुकहरुको क्यामेराको निशाना बनिरहिन् ।

राप्रपाबाट प्रदेश सभा सदस्य रहेकी खेमा देवी बिष्ट पनि आफ्नो मौलिक पोषाकमा सजिएर शपथ ग्रहण गरेकी छिन् । घाँघ्रा र चोलीमा निकै सुहाएकी बिष्ट पनि सबैको ध्यान तानेकी थिइन् । घाँघ्रा र चोली डोटी, अछाम, बाजुरालगायतको मौलिक पोषाक हो ।

सुदूरपश्चिम प्रदेश सभाका नवनिर्वाचित प्रदेश सभा सदस्यहरुले शुक्रबार पद तथा गोपनीयको शपथ ग्रहण गरेका छन् ।
सर्वप्रथम  प्रदेश सभाका ज्येष्ठ सदस्य मानबहादुर रावलले प्रदेश प्रमुख देवराज जोशीबाट शपथ ग्रहण गरेका थिए । तत्पश्चत रावलले बाँकी ५२ जना प्रदेश सभा सदस्यहरुलाई शपथ ग्रहण गराएका हुन् ।