मानबहादुर चौधरी “पन्ना”
माघ टु लौव बरस हुइटो 
माघ टु मुक्तिक दिवस हुइटो 
माघ टु सद्भावके प्रतिक हुइटो 
माघ टु मेलमिलापके प्रतिक हुइटो ।
हरेक साल सबजन माघ मनैठ
हरेक साल टुुहार नाउँम महोत्सव कर्ठ 
हरेक साल टुहार नाउँम नाच, नौटङ्की कर्ठ 
हरेक साल लर्कासे बुह्राइलसम लौव लुगा घल्ठ 
तर,
लौव जोश जाँगर हुइल ठर्या नि डेख्ठु
लौव उमङ्ग उत्साह ब्वाकल बठिन्या नि डेख्ठु
टुहिन लौव बरसम लौव उमङ्ग डिह नि स्याक ठुइट 
मुक्ति दिवसके दिन फेन 
हमार निर्डोेस डाडुभैया बन्दी बनल बनल बाट
सद्भाव सहिष्णुताके रटान सरकार कर्टि रहठ 
खै का कारनले सरकार हमन कर्या नजरले हेर्टि रहठ
हमार हक अधिकारप्रति सद्भाव नि डेख्ठु 
एक्क देशक नागरिकम फेन समानता नि डेख्ठु 
हरेक बरस माघ महोत्सव मनैलक, 
गीत गैलक फगट फगट डेख्ठु ।
ओह मार,
जाट्टिक मुक्तिक डगर खोज्डेउ टु
समानता, सद्भावके डगर खोज्डेउ टु
थारुन दासताके नजरसे केल हेर्ठ 
हमार हक अधिकारके सहर खोज्डेउ टु
माघ टुहार नाउँम कत्रा मनै दुखके गीत फे गैठ
माघ टुहार नाउँम कत्रा मनै खुशीक गीत फे गैठ
माघ टुहार नाउँम कत्रा मनै मुक्तिक गीत फे गैठ
माघ टुहार नाउँम रहरके गीत फै गैठ । 
तर, 
टुहार सुग्घर गीतम फे 
आधुनिकताके अश्लिल फुलकुमारी केल डेख्ठु 
शब्दक अर्ठ नि बुझ्ना डिजेक ढ्वाङ्ग केल डेख्ठु 
मदहोस हुइल ठर्या बठिन्न्के स्वाङ्ग केल डेख्ठु
महि दुख लागठ, 
म्वार पुस्ता माघमसे का सिखट ?
भर्खरिक भैयाबाबु हुक्र संस्कृतिसे का सिखट ?
म्वार बुडि, बुबा, नट्या, नटिनेन् का सिखाइट ?
खै कहाँ कमजोरी हुइटा ?
आज म्वार संस्कृति रुइटा
आधुनिकताके फरिया पेहर्ख घिनलग्टिक हुइटा ।
काखर कि,
माघ टुहार गीत मृदङ्ग ट हमार पहिचान हो 
माघ टुहार नाच ट हमार चिन्हारी हो 
हमार पुर्खनके सैडान हो 
ओहमार माघ, 
अर्जि लगाइटु, बर्जि लगाइटु 
सक्कु युवा पुस्ता हुकहन
गाउँबस्तीक गोची गोचा हुकहन
आधुनिकताम रमैटि रलक फुलकुमारी हुकहन 
सबजहन लौव जोश ओ जाँगर डेउ
गीतबासके सुग्घर मागर डेउ
ठुन्यार भावना ओ लौव उमङ्ग डेउ
आफन हक अधिकारके लाग लर सेक्ना जङ्ग डेउ 
हे मोर डाइ बाबा
हे मोर बुडि बुबा
हे मोर काकी काका
आफन पुस्तन  असल संस्कार ओ ढङ्ग डेउ
छत्रि असक जोढा विर बिरङ्गनके सङ्ग डेउ ।
                                    वीनपा–२, सुर्खेत