आयोजकह जयगुर्बाबा !

कार्यक्रम समिक्षाक ब्यालम मै म्वार आपन्अ समय व्यस्तताक कारण बैठ नि सेक्नु ! समीक्षा बैठक म बैठ नि पाक महि चुकचुक लागटा। मनम लागल बाट, ओ सिखल बाट सम्मेलन टट्ल रहल ब्यालाम ढैलसे अर्थपूर्ण हुइने रह, टभुनेफे एक डुइ बाट कह चाहाटु !

माघ महोत्सव व ७वा थारु साहित्यिक सम्मेलन-२०७९ भव्य व सभ्य बनाक निम्जैलकम आयोजक, कार्यक्रमके वक्ता, सहजकर्ता, कला प्रस्तुतकर्ता व उपस्थित हुइलक सक्कु सहभागीहुँकन्हक बरा भुमिका बाटिन् ।

सम्मेलनम लर्कापर्का से बुह्राखाह्रा सक्कु उमेर समुहके सहभागी उपस्थित कराइ सेक्लकम आयोजकहुकन सम्मान बा, ट फे, सहभागीनक संख्या ह कसिन कार्यक्रमक डिजाइन /फर्म्याटमार्फत आकुर बह्राइ सेक्जाइ कनाम निरन्तर छलफल व निर्स्कर्ष साँटासाँट कर पर्ना डेख्पर्ठा ।

ओसहेक साहित्यिक सम्मेलनक तयारी बैठक कम्तिम ३ महिनाठेसे पाक्षिक रुपम कर्टी गैलसे आवश्यक डकुमेन्ट, प्रचारप्रसार सामग्री निर्माण, विषय ओ प्यानलिस्ट छनौट , आर्थिक सहयोग, जसिन ट्याम लग्ना काम सहजिल हुइने रह।

                                                                 "साहित्यम थारु युवा " सेसनम प्यानलिस्ट लेखक प्रणव आकाश (टोप घल्ले)

अखिस के साहित्यिक सम्मेलनम यदि नाच नै होडेहटह ट, दर्शकके खडेरी लग्ना अवस्था घनि घनी देखा पर्टह । यी हिसाबले साहित्यिक सम्मेलनम महा सुहाउनसे, दर्शकन्हक अवस्था टौल टौलके माघ महोत्सव के रुपम नाचगान, व प्रतिभा प्रस्तुत हुइलक महा ठुन्यार लागल ।

तर अइना डिनम साहित्यिक सम्मेलनह बिसुद्ध साहित्य सम्मेलन नाउँक ब्राण्डसे केल आघ बह्रैलसे मजा हुइ कि ? माघ महोत्सव या अन्य और कौनो महोत्सव तथा सेलिब्रेसनके आपन छुट्ट महत्व हुइलक ओर्से ओ साहित्य सम्मेलनके फे आपन छुट्ट महत्व ओ प्रभाव हुइलक कारण अखिसके नाउँ ढराइ अभ्यासहे ठन्छे उदाहरणके रुपम लेक समिक्षा कर्ना कि ?

साहित्यिक सम्मेलनम बहस बाहेक मुख्य आकर्षणके चिज का रना, वाकर बारेम फे आब रचनात्मक बहस कर पर्ना बा ! सम्मेलनके प्रचारप्रसारक लाग पोस्टर डिसाइजन, विग्यापन निर्माण कर्ना, भिडियो बनैना कामक लाग छुट्ट ओ चलायमान प्रचारप्रसार टोलि बनाइ पर्ना डेख्पर्ठा ।

सम्मेलनले उठैलक मुद्दाम आधारीत छोट सलिमा, डकुमेन्टरीह सम्मानस्वरुप प्रदर्शन कर्ना व्यवस्थापन कर परल। नाटक फे प्रस्तुत कर्ना हो कलसे, नाटक समुहसे पैल्हसे सहकार्य कर परल, सम्मेलनके मुहठे कहबेर मन रटि रटि फे प्रस्तुत कर नैसेक्जाइट !

कार्यक्रमम पेन्टिङ प्रदर्शनी ह फे महत्वपुर्ण स्थान डेहे परि ।

कौनो सेसन प्रदर्शनीके बिचमे फेन चलाई सेक्जाइ !

सम्मेलनम एकठो 3 जहन जति स्रास्ट्राहुँकनके रचना सुन्ना किसिमके सेसन बनाइ परल व रचना वाचनकलाग लाग फे अलि व्यवस्थित समय निर्ढारण कर परल ।

साहित्यिक सम्मेलनम सहभागीहुँकन अंस्या लग्टी समय खिर्बासे कर्ना साधन केल नि होक रचनावाचन ह सम्मानित रुपम कर पर्ना महसुस हुइल ।

सम्मेलनम थारु भाषा, संस्कृति ओ थारु केन्द्रित मुद्दाम बहस हुइना सबसे महत्वपुर्ण बाट हो ! यी बिषयम माघ महोत्सव व ७वा साहित्यिक सम्मेलन २०७९ सफल हुइल बा !

सम्मेलनक भव्य ओ सभ्य सफल्ताके बारेमा जगजाहेर बा ! सम्मेलनम "साहित्यम थारु युवा " सेसनम वक्ताक रुपमा डु चार बाट ढर पाक खुसी बाटु, उहिसे ढेर गोचाली थारु समाजके दिनराटके खटाइ ओ व्यवस्थापनके लाग खुसी बाटु !