टीकापुर राजवन्दीहरुको न्यायसँग संबन्धित मुद्दा बिगतमा हामी सबैले गरेको आन्दोलनसँग सम्बन्धित भएकोले हामी सबैलाई यो कुराको बोझ र दायित्वले थिचेको छ । उहाँहरुको न्यायको लागि लड्नुको पछाडि दायित्वबोध र नैतिकताको आत्मबोधले हो, कसैलाई भगवान र मसिहा मानेर होइन । 

टीकापुरका सबै राजवन्दी निर्दोष छन् र सबै हाम्रा लागि बरोबर सम्मानजनक छन् । 

थरुहट आन्दोलनमा राजनीतिक हिंसाबले सबैभन्दा बढी त्याग लक्ष्मण थारुले गरेका छन् । यदि उनी पद लोलुप भईदिएको भए आज माओवादीबाट धेरै पटक मन्त्री भइसक्थे । तर निरन्तर उनी आन्दोलनमा रहिरहे, लडिरहे । मेरो नजरमा उनी राजनीतिक प्राणी हुन् । 

त्यसो भनिरहदा लक्ष्मण थारुबाट कमी कमजोरी केही भएको छैन भन्ने होइन । सबैभन्दा बढी मौका पाएको पनि उहाँले नै हो र सबैभन्दा बेशी गल्ती गरेको पनि उहाँले नै हो । सबैभन्दा राम्रो पक्ष भनेको उहाँले आफ्नो गल्ती स्वीकार्नु हुन्छ । त्यसैले त उहाँ राजनीतिक प्राणी हो । 
लक्ष्मण थारुलगायत रेशम चौधरी र टीकापुर राजवन्दीका अन्य दर्जनौको मुद्दा छिनोफानो हुन बाँकी छ । 

म नागरिक उन्मुक्ति पार्टीमा लाग्नुको एउटै कारण भनेको राजनीतिक शक्ति निर्माणमार्फत् टीकापुर राजवन्दीहरुलाई न्याय दिलाउनु हो । वैशाख भन्दा पहिले नै यो मुद्दा टुङ्याउन सबै जना आआफ्नो तर्फबाट प्रयास गरौं । यो मुद्दा किनारा लागि सकेपछि जसलाई जहाँ जान ईच्छा हुन्छ जाऔं तर त्यो भन्दा पहिले आफ्नो जिम्मेवारी पुरा गरौं । म यो कुरामा पूर्ण प्रतिवद्ध छु । 

राजवन्दीहरुको रिहाईपछि  तपाईंहरुले जस्तै म पनि एउटा निर्णय लिन्छु । मेरो राजनीतिक धार भनेको बैकल्पिक राजनीति हो । यो कुरा कसैमा भ्रम नहोस् । 

वैकल्पिक पार्टी खोल्नु भनेको वैकल्पिक राजनीति होइन । वैकल्पिक राजनीति भनेको परम्परागत राजनीतिक पार्टीहरुले जस्तै गरी पार्टी चलाउने कुरा बैकल्पिक राजनीति होइन । पुराना पार्टीहरुले भन्दा फरक नयाँ विकल्प दिनु वैकल्पिक राजनीति हो । ती कुरा पार्टीहरुको संचालन विधि, पद्धति, विचार, दर्शन, संस्कार सबैमा नयाँ विकल्प दिनु बैकल्पिक राजनीति हो । 

तसर्थ, कोही डराउनु पर्दैन । मेरो राजनीति बैकल्पिक राजनीति हो । पहिले तत्कालको लक्ष्य भनेको टीकापुर राजवन्दीहरुको रिहाइ गर्नु हो । यो अभियानमा सबै एकतावद्ध भएर लागौं । तपाईं हामी सबैको अन्तिम प्रयासले सार्थकता पाउँछ भन्ने विश्वाश छ । 

देउवा सरकारको बेला तात्कालीन गृहमन्त्री बालकृष्ण खाँडले ल्याउनु भएको अध्यादेशमा मेरो प्रयास के थियो भन्ने कुराको लेखाजोखा भोलिका दिनमा समाजले गर्नेछ ।