समाचार स्रोत अनुसार सो पार्टीले अध्यक्ष रञ्जिता श्रेष्ठ चौधरीलाई सरकारमा सहभागी गराउने तयारी गरेको छ।

सुदूरपश्चिम सरकारलाई समर्थन गरेर कांग्रेस–माओवादीसहितको सत्ता गठबन्धनमा जोडिएको नागरिक उन्मुक्तिबाट अध्यक्ष रञ्जिता नै सरकारमा जान लागेकी हुन्। 

यद्यपि नागरिक उन्मुक्तिले लिने मन्त्रालय टुंगो लागिसकेको छैन। उसले सहरी विकास या वन तथा वातावरण मन्त्रालय लिन चासो देखाएको छ।

प्रधानमन्त्री पुष्पकमल दाहाल प्रचण्डले मंगलबार विस्तार गर्न लागेको मन्त्रिमण्डलमा श्रेष्ठ पनि मन्त्री बन्ने उक्त पार्टीका एक पदाधिकारीले जनाए।

‘सरकारमा जाने कुरा निश्चित जस्तै छ, पार्टीबाट अध्यक्षले प्रतिनिधित्व गर्नुहुन्छ,’ ती पदाधिकारीले भने, ‘तर मन्त्रालयको टुंगो लागेको छैन, हाम्रो माग मुद्दाको कुरा पनि छ, त्यो सम्बोधन हुनुपर्छ।’

उनका अनुसार नागरिक उन्मुक्तिलाई एउटा मन्त्रालय दिन प्रधानमन्त्री तयार छन्। तर, थप एउटा राज्य समेत पाउनुपर्ने पार्टीको अडान छ।