बैठकमा सहभागी एक पदाधिकारीका अनुसार प्रधानमन्त्री प्रचण्ड आफैले मोदीलाई सरकारबाट फिर्ता बोलाउने प्रस्ताव गरेका थिए । प्रधानमन्त्रीको प्रस्तावलाई पदाधिकारी बैठकले अनुमोदन गरेको हो । 
उनको ठाउँमा जनमत पार्टीकी सांसद अनिताकुमारी साहलाई मन्त्री बनाउने तयारी भएको छ । साहलाई सोमबार बिहान १० बजे पद तथा गोपनीयताको शपथग्रहण  गराइने राष्ट्रपति कार्यालयको तयारी छ । 

३ माघ, २०७९ मा पहिलो पटक शक्तिशाली मन्त्री नियुक्त भएका मोदी ७ महिना नपुग्दै सत्ता सन्तुलनको कोपभाजनमा परेका हुन् ।

गत मंसिरमा  भएको निर्वाचनमा ३० हजार ६१२ मतका साथ एमालेका उम्मेदवार विनोद ढकाललाई उनले पराजित गरेका थिए । उनका प्रतिस्पर्धी ढकालले २४ हजार ४६३ मत मात्रै ल्याएका थिए । 
त्यसअघि २०७४ को संघीय प्रतिनिधिसभा सदस्य निर्वाचनमा मोरङ क्षेत्र नं. ४ बाट कांग्रेसका प्रभावशाली नेता महेश आचार्यलाई पराजित गरी चर्चामा आएका थिए मोदी । 
आचार्यलाई ६ हजार ७ सय २९ मतले पराजित गर्दै प्रत्यक्ष निर्वाचनको विजयी यात्रा तय गरेका थिए ।  मोदीले ३३ हजार ५ सय २९ मत ल्याएका थिए । उनका प्रतिस्पर्धी काँग्रेसका आचार्यले २६ हजार ८ सय मत पाएका थिए । 

२०७० को दोस्रो संविधानसभा निर्वाचनमा मोदी समानुपातिक सांसद थिए । कोशी प्रदेशमा प्रत्यक्ष निर्वाचन जित्नेमा मोदीसहित भोजपुरबाट सुदन किराँती र खोटाङबाट रामकुमार राई रहेका छन् । 
२०४२ असोज ५ गते जन्मेका मोदी २०५६ सालदेखि राजनीति सुरू गरेका थिए । उनी अनेरास्ववियु क्रान्तिकारीको जिल्ला कमिटी सदस्य हुँदै जिल्ला कमिटी अध्यक्ष, नेकपाको प्रदेश कमिटी सदस्य पनि बने । अहिले उनी केन्द्रीय कमिटी सदस्य छन् ।

संघीय निजामती ऐन आफ्नै पालामा पारित गराएर आफ्नो थारु समुदायलाई जातीय जनसंख्याअनुसार साढे ६ प्रतिशत आरक्षण कायम गराउने मोदीको सपना अधुरै रह्यो ।