लिप्स्टिपिक रुख्वा अस् स्वाझ् बाटुँ
जिन्नक रुख्वा अस् निख्खार बाटुँ
टुँ डुरसे चिन् सेक्लो 
मै थारु रुख्वा हुइटुँ।
सक्कु ज मैहेँ रोस्ठ
सक्कु ज मैहेँ खोस्ठ
घरक् खुँटा बनाइक् ला
बगर्वक् कोरै बनाइक ला ।
घरक् खुँटा बनाइबेर
किउ कुह्रारिले ठप्काइट्
बगर्वक् कोरै बनाइबेर
किउ हाँठ्या आरिले ग्याँरट्।
टभुन मै चामचिम् पलि रठुँ
कट्वा पाइबेर कुह्रार अछिन्के 
महि ठप्क नि आइट्
पानी नि पाक रुइना 
ढन्सुहिअस् चिल्लाइ नि आइट्
उह मार,
 कैहेनिक् मन्त्री मन्डलम फे 
महि काट्के और जाहिन गस्किल ।
मै भित्र भित्र कठ्याक् रुइनु 
उ बाट् म्वार आँख् हन पटा बाटिस्
आपन्न सङ्घारि मन रुइबेर
डुन्ड्रि अस् आँस् बहाइ नि पैलक् डुख्
साइट् मै टेनक् रुख्वा अस् रटुँ ट
के ह्यारट् महि ?
साइट् मै गुल्ह्रिक रुख्वा अस् रटुँ ट
के ड्याखट् महि ?
कैहेनि शिक्षा ऐन म फे
म्वाँर फेड्रि ठप्कल ।
म्वार छाहिँ हटिल ।
टभुन मै ऐया वा फे नि कनु ।
महि काजे ठप्कलो नि कनु
महि गेर्ना हाँठ्हन नि पिट्नु
महि ग्याँर कना मुँहन नि ठुक्नु
मै लाट् कलसे 
जाँर ढोक्क जन्नि गर्याए आइट्
मै हाँठ् नि लगिनाहा कलसे
आपन जन्निहन ठठाइ आइट्
टभुन महि कटुइयनके लाक्
लिप्स्टिपिक रुख्वाअस् स्वाझ् बाटुँ
जिन्नक रुख्वाअस् निख्खार बाटुँ ।
मै थारु रुख्वा ।।