सरला चौधरी

काठमाडौंमा वसोवास गर्ने थारुहरुले अष्टिम्की पर्व काठमाडौंको विजुली बजारस्थित क्रिष्टल पार्टी प्यालेसमा मनाउने भएका छन् ।

थारु महिला अग्रासन समूहको प्रमुख आयोजना तथा थारु विद्यार्थी समाज, बर्दियाली थारु विकास मञ्च, जेनस इन्टरनेशनल प्रालि, चम्पन सांस्कृतिक समूहलगायत थारु संघ संस्थाहरुको आयोजनामा भदौ २० गते कार्यक्रम हुनेछ ।

यसका लागि थारु महिला अग्रासन समूहकी उपाध्यक्ष किरण चौधरीको संयोजकत्वमा २० सदस्यीय मूल आयोजक समिति गठन गरिएको छ ।

थारुहरुको मौलिकता बोकेको विभिन्न पर्व लोप हँुदै जाने अवस्था भएकोले यसको संरक्षणको लागि तथम नयाँ पुस्तालाई जानकारी दिने हेतुले २०७२ सालदेखि नै अष्टिम्कि पर्व काठमाडौंमा मनाउन थालिएको जेनस प्रालिका प्रोपराइटर तथा अग्रासन समूहका सल्लाहकार शिव शक्ति चौधरीले बताए ।

चम्पन सांस्कृतिक समूहको आयोजना तथा नन्दुराज चौधरीको संयोजकत्वमा समूहको कार्यालय ललितपुरको जाउलाखेलमा २०७२ सालमा पहिलो पटक अष्टिम्कि पर्व संघीय राजधानीमा मनाइएको थियो ।

अष्टिम्कि पर्वमा परिवारमा सुखी र निरोगिताको कामना गर्दै थारु महिलाहरु निराहार व्रत बसी कृष्ण भगवान्को पूजा अर्चना गर्ने गर्दछन् । यस पर्वमा भगवान् कृष्णको महिमा गाथा, सृष्टिको कथा बोकेको अष्टिम्कीक् गीत थारु महिलाहरुले गाउने गर्दछन् । अर्को दिन चेलीबेटीहरुलाई अग्रासन दिन जान्छन् । अष्टिम्कि पर्व खास गरी पश्चिमा थारु समुदायमा भव्यताका साथ मनाइन्छ ।