मुना चौधरी

हमर साथी  कोदाइर, हसुवा, पसनि या ढकिया ।
हमर पहिचान हर, बरद
हम गर्व करै चियै आपन काममे
हम खुसी चियै आपन पहिचानसे ।
 हमर उब्जेलहा अन ख्याके जिरल छै यी दुनिया
हम यै संसारके जीवनदाता 
चरचर बेमा फाटल टाङ ल्याके
भुख, पियास नै बुइझके
निकलै चियै सैब चिज त्याइगके खेत ।
लाल पियर से बेसी हमरा हरहियर रङ निक लागैये
कथिले त हमर बाइल बिरहि हरहियर हैछै त 
हम खुसी से पुलकित हैचियै ।
  हमरा राइत से निक दिन लागैये
दिन से निक 
डगडग हरहियर या पाकल धान, गहौम या बाइल बिरहि निक लागैये ।
हम गिरहत
रौदी से निक हमरा पाइनझाइर लागैये
गर्मीसे निक हमरा जार लागैये 
कथिले त वर्षामे धान रोपै चियै या जारमे धान काटै चियै ।
प्रेम छै हमरा धान, चौरसे भोरल कोइठसे 
स्नेह छै हमरा पसिनासे भिजल हाथसे
हमरा मात्रे करममे विश्वास लागैये ।
हमरा हमर पसिनामे विश्वास छै ।
हमर पगरी हम कैहियो ने झुकैले देबै 
हम अइ संसारमे आदमीसबके भुखे कैहियोने मोरे देबै ।
हम गिरहत 
हमर पहिचान चियै परिश्रम
हमर आत्म विश्वास चियै मेहनत ।