टुँ यि ड्यासक ड्वासर दर्जक नागरिक, 
टुँ जर्मटिहक कमैया कम्लहरी,
हम्र टुहाँ उँप्पर दया मान्क,
जैह्यासे,
मुक्त कमैया व मुक्त कम्लहरी घोषित कर्लहि टुहिन,
उह डिनसे,
टुँ सक्कु समस्यासे मुक्त होसेक्लो ।

टुँ,
आपन बिगत बिसर सेक्लो
अङ्ग्रि पैलो ट हाँठ लिल ख्वाज्टो
टुँ,
हँर व फर्ह्वा कमिना जाट
टुँ,
धान निकाइ बेर हाँठ सरिना जाट
आज काजे नि सुहिना माग ढरटो

टुँ,
चलिटि बाटो जे गाउँ, मटावा बन्क,
आप काजे ढिरसे
ड्यासक मटावा बन्क ड्यास चलिना सप्ना ड्याखटो ?
टुहन,
मिलाइ हम्र जानल बाटि 
टुहन,
फुुटाइ फे हम्रह जानल बाटि

टुह्र,
जाँर पिओ या डारु, किउ कुस कहुइया निहो,
टुन्हँक जाट ट मटवाली,
जाँर, डारु टुन्हँक जाटसे पैलक,

टुह्र 
मुस खाउ या घोङ्घि,
टुह्र मार पिओ या जाँर,
किउ कुछ कहुइया निहो,
बालुवाटारके पानी भरिक
पिना सोस केल ढर्बो कलसे फे
टुहिन किउ बान मार सेकहि,
फे कुछु बहाना पार्क,
टुहिन डिल्लीबजारिक ख्वाँरिम डार सेकहिँ 

उहमार,
टुँ स्वाझ जाट 
ना ठप्काउ आपन ग्वार,
ना बाँढो आपन हाँठ अप्नहँ
काजेकि टुँ
पैलह मुक्त हो स्याकल बाटो ।