हमरो मन लागैये दोसरके सुन्दर बनाइले
हमु चाहै चियै केकरो आवश्यक्ता बनैले
अपना उजैरके
चाहै चियै हमु दोसरके श्रृङ्गारैले
अपना असगरो रैहके
हमु चाहै चियै
दोसरके एक ठाम मिलाइले 
 अपना गैलके दोसरके जीवन देनाइ
साइत यहया चियै
सुन्दर जीवन ।
छै ऊ  देखैले भुट
ओकरा कतेक कोइ  कहैछै छोटकि 
भुटकि, कनकिरबि, बितबि 
लेकिन ओकर नाम चियै झिकनाठि ।
देखैले छोट छै लेकिन
काम करैछै बरका
ऊ अपना टरटर्याके कसल छै
सुखल टट्याल छै लेकिन
जरनाके एक ठाममे मिलाइने छै 
जरनकरी सब मुरमे जरनाके बोझ बोकने छै
जरनाके बोझ बान्हलछै घुरीके जिनासे
जिनामे ओझरयाल छै झिकनाठि 
ओह्या झिकनाठि कसैछै ताब
 सैब जरनाके एकठमा बोझ बान्हाइछै ।
झिकनाठि बेगर जरनाके बोझ नै कसल जाइछै
पेराघेरा बोझ खुलैके रहैछै डर
यी छै एक बिताके
जारनके टुक्रा 
जेकरा कहैछै झिकनाठि
ऊ असगरे छै लेकिन
सैब जरनाके एक ठाममे मिल्याके राखने छै
अपना श्रृङ्गार विहीन छै लेकिन
जरनाके पचियाके श्रृङ्गारने छै बोझमे ।
जिनामे ओझर्याल छै ऊ
जिना ओकर  उपर हैकम जमाबक चाहिँ लेकिन
उल्टिये ऊ
जिनाके आपन वसमे राइखके
जिना उपर अधिकार जमाइने छै 
जरना सबके उपरमे बैठल छै सानसे
जिनाके वशमे राखने छै
मालिक ऊ खुद बनल छै  ।
चलाइने छै शासन येहेन तरिकासे
जेना लागैछै 
झिकनाठि बिना जिना या जरनाके 
कोनो मोल 
सुन्दरता 
एकता 
महत्तव नै छै ।
झिकनाठिबिना,
जरना रहैछै छिरियाल
 बितियाल
झिकनाठि जरनाके बोझके
कुरूप हैसे बच्याके
बनाइछै सुन्दर
ऊ जरनाके
अनाथ हैसे बचाइने छै
ऊ जरनाबे बोझके चियै
एकटा असल महताइर
जिम्मेवार अभिभावक
निस्वार्थ मित्र 
कुशल शासक ।
.......