बाबक मन,
हुँकाहारअ झुल्वा फाट अस फाटल रटिन कलसे
डाई गोलि, ढागो व सुइ लेक टङ्गर डेटि 
पुरान मनह लौवसे 
फ्यार नि सेक्लसे फे
डाई, मन ह मनसे जोर डेटि
बाबक मन,
हुकाहारअ बर्खम सरल हाठ अस रटिन कलसे
डाई, मट्टि ट्यालिक डिया बार्क
कसुङ्नक ढुँवले 
खुन्जास बटिना कैक
कर्या कराक सेक डेटि 
बाबक मन,
हुकारअ बिनल टुट्लि सुप्पा अस रटिन कलसे 
डाई, खरि भिजाक
ओक्र गिल्वले निप्क
टुट्लि सुप्पा अस मनक बिर्वा करडेटि ।
बाबक मन,
हुकाहारअ बनाइल चुन्हा घर अस रटिन कलसे 
डाई, गाउँ मनैन बलाक 
लौव खरले छाँइ कैडेटि ।
बाबक मन,
हुकाहारअ लगाइल आलु अस रटिन कलसे
सरल आलु फाँक्क 
डाई अल्होर्क 
पैरक झोठ्निम टङ्गाडेटि ।
बाबक मन,
दूध फाट असक फाटल बाटिन । 
बाबक मन,
कब्लि सर असक सरल बाटिन ।
बाबक मन,
सिसा फुट असक फुटल बाटिन । 
बाबक मन,
बज्का डारल आलु असक सरल बाटिन ।
बाबक मन असिन कराइक ला
राज्य लागल रह ।
जसहँक रज्वक छावा रज्वा बन्ठ
ओसहँक म्वा बाबा, बुबक छावा बन्ल ।
हुइना ट साउन २ गते 
राज्य म्वा बाब मुक्त घोषणा करल 
ड्यास म ढ्यार बड्लाउ आइल 
लोकतान्त्रिक गणतन्त्र आइल 
टभुन म्वा बाबा 
आपन मलिक्व डेख्ठ ट झस्कठ
काजे कि
म्वा बाबक मनम,
आम्हि उह तन्त्र पलि बाटिन
जोन तन्त्र म उ
जर्मल बाह्रल रलह ।