नेपाली साहित्य कौनो कृति लिख्बो कलसे छाप्डेना ढ्यार प्रकाशक हुक्र बाट । हुकनक ड्यास भर नेटवर्क बाटन । छाप्डेठ । बेच्ना जिम्मा लेडेठ । थारु साहित्य म बिडम्बना । साहित्यिक नसा जगाडेना ढ्यार मनै बाट । संघसंस्था बा । वाक पाछ निक्रलक नतिजा ह प्रकाशन करडेना किउ नि हो । आपन रुप्यले पोस्टा छपाइक ला कैह्यासम लिख्ना ? पोस्टा छप्ना डुख । ओहिँ बिकैना डुख । आप थारु साहित्य काजे लिख्ना ? आप थारु साहित्य कसिक लिख्ना ? सड्ड लिख्ना बहसकेल काजे चलैना ? पोस्टा कसिक प्रकाशन कर्ना कैक बहस काजे निचलैना ?

मै मन्ठु हर साल हुइना थारु साहित्य सम्मेलन थारु साहित्यक फँट्वम बहुट मलजल डिहटा । बिडम्बना ओट्रा भार जमघटम पोस्टा कसिक छप्ना कैक कब्बु बहस नि हुइट । आप थारु साहित्यक बिकासक ला लिख्ना भार बाट नि हो । प्रकाशन ह कसिक सहङ बनिना भार सवाल हो ।

मै नि कठु सक्कुन्हँक पोस्टा प्रकाशन कर्डि । कौनो स्रष्टा पहिल पोस्टा प्रकाशन करटा कलसे, बरस म एक्ठो लौव स्रष्टक पोस्टा प्रकाशन करडिहक ला का अर्थ जुटैना का हमाठे सामर्थ्य नि हो ? ओसिन हो कलसे का काम बा थारु साहित्य प्रति संघसंस्थाक ? औचित्यहिन संघसंस्था  आप खारेज काजे नि कर्ना ?