पैल्ह‐पैल्ह भ्वाज हुइलसे दुल्हक घरक मनै दुल्हिक घर टङग्री फाँक जाइट, अर्थात् सामान्य रुपम कलसे सम्धी लागट । तर काजकाल ‍औरजन्हँक दडखासिकी अन्सार सम्धी लग्ना चलन चलल बा । 

मै तुलसीपुर उपमहानगरपालिका–११, नवलपुर गाउँक बुझौना चौधरीक छावक उर्री‐उर्रा भ्वाज खाए गैनु । टब टङग्री फाँक जाइबेर सम्धी लाग जाइबेर दुल्हा घरक मनै दुल्हिक घर छिट्नीम २ गोल्रा जाँर, २ गोल्रा डारु, १ ठो सुरक फेँन्ड्वा, २ ठो मुर्घा ओ २ ठो गोन्ड्री डेख्जुँ । 

ओस्हक जत्रा निँढल सिकार, पक्वाइल टिना २्२ टेप्रा डोनी, साग सब्जी, एक जोर्ह्या पिप्पर, एक जोर्ह्या हर्डि ओ एक जोर्ह्या अड्वा लेक टंग्री फाँक जाइट डेख्नु । पुरान चलन नै हेराइल डेखबेर फोहि लागल ।

ओस्हक सम्धी‐सम्धिन्याहुँकन्हक लाग लुगागहना, फलफुल, स्याउ क्यारा लेक सम्धी लग्ना सामान लेक फे जैठ । गाउँक मटावँक लाग एक गोल्रा डारु, एक्ठो मुर्घा ओ एक्ठो गोन्ड्री लेक फे जैना कर्ठ ।

सम्धी लागबेर दुल्हक पक्षसे डबल रुप्या डर्ना चलन बा । ओसक दुल्हक पक्षसे दुल्हिक पक्षहे दुधक म्वाल, कोख छुटौनी ओ ड्वार छेकौनी कैक पैसा डेह पर्ठा । दुल्हक बाबा, गाउँक मटावाँ ओ २ जन संलग्वा  दुल्हिक घर टङग्री फाँक जाइबेर रठ ।