काठमाडौं, कीर्तिपुर, पाँगास्थित बरघर रेस्टुरेन्टमे हुइल बखेरीमे कवि शान्ति चौधरी, भूमिका थारु, सन्तोषी चौधरी सञ्जय सुमन, कृष्ण समर्पण, इन्द्र चौधरी, कृष्णराज सर्वहारी, जगत बाशिष्ठलगायत स्रस्टालोग चुनाव बिसेस रचना सुनैले रहिट ।

सन्तोषी चौधरी धानक् झुट्टी प्रदर्शन कैटि उहे सिर्सकमे वाचन करल कविता आकर्सक रहे । 

कार्यक्रमके घरगोस्या कृष्णराज सर्वहारी कीर्तिपुर क्षेत्रमे बहुट थारु युवा रटि रटि मजा सहभागिटा नै हुइ सेकल कारन ठुम्रार श्रृंखला भौतिक रुपले बन्ड कैना सोच आइल बटैलाँ । उहाँ समयहे मध्यनजर कैटि आब जुममार्फट कार्यक्रम कैना कि ? कना बाट ढर्ला । मने कार्यक्रमके सहभागिलोग ठन्चे सहभागिटा रलो पर ठुम्रार साहित्यिक बखेरीके आपन इटिहास रहलओर्से बन्ड नैकैना अर्जि कर्ला । 

ओस्टक कार्यक्रममे माघ १५ से १७ गटेसम पर्सामे हुइल १०वा थारु साहित्य राष्ट्रिय सम्मेलनके समिक्षा फेन कै गइल । कार्यक्रममे पर्साके सम्मेलनमे सहभागिलोग उद्घाटन सत्र कुछ लम्मा हुइलबाहेक सब पक्ष मजा रहल बटैलाँ । कार्यक्रममे श्याम गोइजियार, सियाराम चौधरी, राकेश चौधरी, सञ्जय सुमन लगायत सहभाागिलोग २०८३ सालमे चितवनमे हुइना ११वा थारु साहित्य राष्ट्रिय सम्मेलन आउर भव्य कइसिक बनाइ सेक्जाइठ, समयमे टयारि करे पर्ना बटौलाँ । 

कृष्ण समर्पण ११वा थारु साहित्य राष्ट्रिय सम्मेलनमे अपन पोस्टाके घुर्घुट खोल्वइना जनैलाँ । उहाँ थारु साहित्य राष्ट्रिय सम्मेलनके ५ वर्षे, १० वर्षे रणनीति बनाके इहि आर्थिक रुपले बल्गर बनाइ पर्नामे जोर डेलाँ । कवि शान्ति चौधरी ठाउँ ठाउँमे थारु साहित्य राष्ट्रिय सम्मेलन कैना सवल पक्ष रहल कहटि, सम्मेलन करल ठाउँमे का प्रभाव परल, यकर अनुगमन जरुरी रहल ढारना रख्लि । राकेश चौधरी थारु साहित्य सम्मेलनमे गैरथारु स्रस्टनके फेन उपस्ठिटिमे जोर डेलाँ । लेखनाथ चौधरी थारु कल्याणकारिणी सभा थारु भासा साहित्यके लग बहुट कुछ करि कि कना अस्रा लेलकमे नै सेकल कहटि थारु लेखक संघ नेपालके डायरा फराक बनाइ पर्ना बटैलाँ । लेखक संघके आजीजन सदस्य बह्राइ पर्ना, सम्मेलनमे प्रवेश शुल्क टोके पर्ना उहाँक् सल्लाह रहिन । 

थारु लेखक संघ नेपालके अध्यक्ष कृष्णराज सर्वहारी ठाउँ ठाउँमे थारु साहित्य राष्ट्रिय सम्मेलन करल सहआयोजकलोग जिल्ला, क्षेत्रिय स्टरमे नियमिट कार्यक्रम कैनामे लग्ना चाहि कनामे जोर डेलाँ । उहाँ इहे बरसके चैतके अन्टिम अठवार कैलालीमे हुइटि रहल थारु लेखक संघ नेपालके अधिवेशनमे आइक आजीजन सदस्यलोगन नेउटा डेलाँ ।