अइ भैया–बाबु
चकलेट नै खैना हो
डाट किराइठ ।
बेनसे खुटरुकियामे डारो
एक–एक रुपिया
कापी किटाब किने पुगि ।

अइ गोचि–गोचा
फोकटिया खर्चा नै कैना हो ।
डाइ बाबक पस्ना सरापठ
बेनसे बैंक खातामे बचोट करो
सौ, पचास रुपिया
उच्च शिक्षा पर्हे पुगि ।

अइ डाडु–बहिनिया
विदेश नै जैना हो ।
देश सरापठ
बेनसे गाउँमे मुर्गि फारम खोलो
घरदुवार चलाइ पुगि ।

अइ डाइ–बाबा
सरकारके मुह नै हेर्ना हो ।
सरकार ढोखा डेहठ
बेनसे गाउँ गाउँमे सहकारी खोलि
बचोट करि
हजार पचास रुपिया
गाउँ, समाज ओ देश
विकास करे सेक्बि ।

अइ भैया–बाबु,
गोचि–गोचा, डाडु–बहिनिया
ओ डाइ–बाबा ।
फोकटिया खर्चा नै कैना हो,
एक–एक रुपिया बचोट करि
हमार समाजके विकास करि ।

                            –लमही नगरपालिका– ४ सेमरहवा, देउखर दाङ

सन् २०१७ डायरी