घर पछारी के बारीमे 
फेकल फचारल
ढरहियाल छै
पाइन मे भिजै छै
रौद मे टटाइ  छै
कोनो काम के नै छै
से कैहैत अपहेलना करैत
फेक देने छेलियै घर पछारीके बारीमे खखरी ।
कोनो काम के नै छै 
घरमे राखबै कथिले ?
घर मे त ओकरा राखै छै जे काम लागै छै
सुरक्षा ओकरा करै छै जे काम दै छै
यी कोन काम के चियै ?
कोनो काम के नै चियै यी
यहया कहैत फेक देलियै
खखरी के बारी मे
लतियाइलियै
वेवास्ता करलियै
खखरी हमर कोनो स्वार्थ पूरा नै करतै
हम यहया सोचैत रहिलयै हरदम
खखरी के कोनो काम नै लागतै हमरा ।
जब चुइल्ह 
बनाइ के बेर येलै
ताब खखरी के सम्झलियै
जब कोइठ
बनाइ के बेर येलै या
घुर तापै के बेर येलै
ताब  खखरीके सम्झलियै
खखरी चुइल्ह या कोइठ बनाइले काम लागै छै
खखरी घुर तापैले काम लागै छै
से बात त हम भुइल गेल छेलियै ।
जब ओकर आवश्यक्ता महसुस भेलै ताब 
ढकिया ल्या के दौरल गेलियै बारी
आनलियै समैर के 
एक ढकिया खखरी
चलाइलियै आपन काम
चुइल्ह बनेलियै
कोइठ बनेलियै
घुर तापलियै
खखरी नै रहतियै त
कोइठ नै ठरा हेतियै
हमरा कैहियो ने काम लागतै 
कैहके जेकरा बारी मे फेक देने छेलियै
से हमरा समस्या के बेर  काम लागल
कहै छै खखरी के कोन काम ?
 हम कहै चियै खखरी वर काम लागै छै
कोनो आद्मी के एक समय मे 
निरीह या खखरी के संज्ञा द्या के
लोकसब आपन जीवन से दुर कैर दै छै
स्यह्या निरीह लोक एक समय मे ओकरा 
काम लागै छै 
साथ दैछै
तैदुवारे केकरो निरीह कैह के
अपमान नै कर
निरीह लोक के साथ दया के 
सहयोग कैर के 
अगारी बरहै के मौका दियौ
एक दिन समय येलापर
ओह्या खखरी 
मूल्यवान रूपमे
 काम लागै छै ।