थारु भाषाक आजसम नै मिलल हो लिपि
देवनागरिक लिपिक कुछ वर्ण हटैना काजे कर्ना ढिपी
निमाङ् शब्द जस्टक बोल्ठी ओस्टक हम्र लिखी
साहित्यम लौव लौव शब्द बेल्स सिखी ।

वर्णसे शब्द बनल शब्दसे साहित्य माला
सक्कुजान बोली हम्र आपन आपन पाला
डारल घाना सब्जे मिल्के निख्राय पर्ना बा
दुरगामी विचार कैक बाट हमन ढर्ना बा ।

साहित्यम चलाई हम्र अरगरसे कलम
भाषा कहोंर विग्रटा लगाई हम्र मलम
उठी पह्रल यूवा वर्ग जङ्ग्रार बन परल
छलफल कैक थारु भाषा मानक बनाइ परल ।

भाषा साहित्य कला संस्कृति हमार पहिचान
यहीह बँचाइक लाग हम्र चलाइ अभियान
ठाउँ ठाउँम विचार गोस्ठी अन्तरक्रिया करी
मौलिक ओ आगन्तुक शब्द मिलाके बेल्स परी ।

                 बारबर्दिया नगरपालिका–१०, मेरैया, बर्दिया

प्रकाशोन्मुख कविता संग्रह म्वार मनक् फुलरिया (२०८३) से साभार । इ कविता संग्रह २०८३ वैशाख १ गते ५५वा गोचाली दिवसके अवसरमे बर्दियामे विमोचन हुइटि बा ।