हम कथिले जेबै बिदेश ?
जतके आकाश ओहिनङ्घ निला छै
जत हमर माईके आवाज नै पुगैछै
सडक चौडा आ चम्कैत छै
महज हमर गामके गर्दा ओत नै छै ।

हम कथिले जेबै बिदेश ?
जैठाम पसिनाके मोल सस्ता छै  
सपनाके वजन भारी छै
कतबो मेहनत करु
थकानके साथ अपमान प्यारी छै ।

हम कथिले जेबै बिदेश ?
जै देशमे 
कल कल बहैत नदी नाला छै
हरियर फाँट, उत्तरमे चाँदिके माला छै 
ओई देश छोईर हम बिदेश जेबै कथिले ?

हम कथिले जेबै बिदेश ?
जब आपन माइटमे उब्जल अन्न
दोसरके थारीमे मँहगा बिकैछै
हमर बारीमे लहराइत चाय
ओकर कपमे छलकैत मिलैछैै
महज हमर हाथ 
जतसे खाली लौटै छै ।

हम कथिले जेबै बिदेश ?
जत सपनाके पाँइख काटैछै
समयके पावन्दीमे मेशिन बनैछै
हमरा त स्वच्छन्द उडान चाहि
प्रियवरके मुस्कान चाहि ।

हम कथिले जेबै बिदेश ?
स्वर्गसन स्थान छोइर
अमृतसन रसपान छोइर
लहलहाइत लहरा आ
आपन माइट पाइनके
सुगन्ध, हराभरा छोइर । 

लहान न.पा. १८, सिरहा 
सम्पर्कः ९८४२१७१५५५
इमेलः arunchaudhary5019@gmail.com