विन्तिराम महतो

सुन्ले टु टुह आजकाल कवि हुइल टो
चिरैनके चिरविर चिरविर आवाजमे
सिरिस्टिके कहानि खोज्ठो
फुलनसे पुछ्ठो
अट्रा सुग्घर रुप कहाँसे पैठो ?
मेरमेरिक रंगसे अपन रुप सजैठो  ।

आजकाल टुह डार्सनिक फे हुइल टो काहुु
रुखुवासे पुछ्ठो 
टै आघे कि मै आघे ?
के हो हमार पुर्खा        
टुह बिना मै नाइ, मोर बिना टुह
मेरमेरिक सवाल करठो ।

सुन्ले टु आजकाल 
अढिकारवाडी फे हुइल टो
पिंजडाके सुगुवा ओ खोभरा भिट्टर 
छटपटाइल वनसुवरके 
छटपटिहे अपन छटपटि समझठो
हुक्रनके हक अढिकारके लग सोगैठो
आजकाल्ह टु अढिकारवाडी फे हुइल टो ।

टुु टो ढर्मि फे हुइल टो काहुन,
हावा, पानी, अग्नि, 
रुखबिर्छाके पुजा करठो
मच्छर मारेवेर
पाप ओ ढर्मके बाट करठो
आजकाल्ह टुह बरा ढार्मिक हुइल टो ।
    
टुहिन वैग्यानिक फे कहुु कि
बर्टिरहल डिन (सुर्य) भिट्टर जाके
सोन निकर्ना बाट करठो
यि ग्रहसे उ ग्रह सयर कर्ना
टोरै टोरंगनमे बास बैठ्ना बाट करठो
डिन राट अमृट खोज्ना प्रयास करठो
आजकाल्ह टुुह वैग्यानिक फे हुइल टो ।

टीकापुर, कैलाली 

हालः नेपाल टेलिभिजन, कोहलपुर, बाँके

साभारः लावा डग्गर त्रैमासिक, बरस ७, अंक ४, (कार्तिक–पुस) २०७३
नोटः सिर्सक परिवर्तन