थारु लेखक संघ कैलालीके अध्यक्षमे फेनसे जीतबहादुर ‘ट्रासन’
८६७ दिन अगाडि
|
९ वैशाख २०८१
थारु लेखक संघ नेपाल कैलालीके अध्यक्षमे फेनसे जीत बहादुर चौधरी ‘ट्रासन’ छानगैल बटाँ ।
संघके वैशाख ८ गते शनिच्चर धनगढीमे हुइल डुसरा जिल्ला अधिवेशन ओ चौठा साधारण सभासे उहाँक अध्यक्षतामे नौ सदस्यीय कार्यसमिति सर्वसम्मत रुपमे छानगैल । संघके उपाध्यक्ष कविता चौधरी, सचिव अनिल कुश्मी, सहसचिव दिनेश चौधरी संगम ओ कोषाध्यक्षमे दुर्जन चौधरीहे चयन कैगैल बा । ओस्टक, सदस्यमे राजु चौधरी, लक्ष्मी राना, बालमोती चौधरी ओ रामु कुश्मी बटाँ ।
अधिवक्ता जोहारीलाल चौधरीके संयोजकत्वमे वसन्ती चौधरी, बाँधुराम चौधरी ३ सदस्यीय निर्वाचक मण्डल गठन हुइल रहे । अधिवक्ता जोहारीलाल चौधरी नवनियुक्त पदाधिकारीन् शपथ खवइले रहिट ।
उहिसे पहिले उद्घाटन सत्रमे बोलुइयन थारु भाषा, साहित्य, संस्कृतिके अवस्था कमजोर हुइलमे चिन्ता जनैले रहिट । कार्यक्रमके बर्का पहुना थारु लेखक संघ नेपालके केन्द्रीय अध्यक्ष डा कृष्णराज सर्वहारी थारु लोककला, भाषा संस्कृति संरक्षण कैना सक्कु जनहनके दायित्व रहल धारणा रख्लाँ । ‘थारु भाषा संस्कृति संरक्षण सम्बद्र्धन कैना सब्से बरवार जिम्मेवारी थारु समुदायके हो’, उहाँ कहला, ‘हम्रे आपन समुदायके रीति संस्कृति सम्बन्धी लेख रचना लिखके हुइठ् कि कौनो म्युजिक भिडियो, डकुमेन्ट्री बनाके हुइठ, उ सक्कु हमार जिम्मेवारी हो ।’
रानाथारु डटकमके सञ्चालक नन्दलाल राना रानाथारु लोक कला भाषा संस्कृति दिनदिने हेरैटी गैल कहलै, ‘अब्बे लावा पुस्ता पुरान संस्कृति बिस्रैटि गैल बा । यहाँसम कि अब्बे रानाथारु समुदायके लोकप्रिय टिहुवार होरीमे नाच जैना होरी नाचके लाग डंका बजुइया ओ नचुइया मनै खोज्ले नैमिल्ठै ।’
पहुरा थारु दैनिकके सम्पादक प्रेम चौधरी थारु भाषामे लेख रचना लिखुइयनके कमी होके दैनिक पत्रिका सञ्चालनमे चुनौती ठपल बटाइल रहिट । उहाँ कहलै, ‘पहिले समय सन्दर्भ अनुसार लेखकहुक्रे पत्रिकाके लाग लेख रचना लिखके पठाइट, मने कुछ बरस यहोर लिखुइया व्यक्ति फेन निस्क्रिय हुइल लागठ ।’
थारु नागरिक समाजके संयोजक दिलबहादुर चौधरी आपन रीति रिवाज छोरटि जैना, मने आनक संस्कृति अंगल्टि गैल ओरसे थारु संस्कृति लोप हुइटी गैल बटाइल रहिट । थाकस कैलालीके पूर्व कार्यवाहक सभापति माधव चौधरी लोप हुइटी रहल भाषा संस्कृतिहे बचाइक लाग युवा पुस्ता लागे पर्ना बटाइल रहिट ।
थारु लेखक संघ नेपालके लग अपन दिवंगत गोसिन्याके नाउँमे थारु महिला प्रतिभा सशक्तिकरण पुरस्कार स्थापना करुइया रोदन चौधरी मेडिकलके प्रोपराइटर चन्द्रसिंह चौधरी अपन स्थापना करल पुरस्कारके रकम बह्रैटि जैना प्रतिवद्धता जनैला ।
कार्यक्रममे थारु लेखक संघके आजीवन सदस्यद्वय शेखर दहित ओ सोम डेमनडौरा थारु लेखक संघ ढेर काम करलमे फेन दस्तवेजीकरणके अभाव रहल बटैलाँ । यकर बहुवर्षिय योजनाके अभाव रहल उहाँलोगनके कहाइ रहे ।
अनिल कुश्मी सञ्चालन करल कार्यक्रममे लक्ष्मी राना स्वागत कर्ले रहि ।
