निसराउले असोज १५ गते देउखुरीमा गर्दै गरेको निःशुल्क स्वास्थ्य शिविरको तयारी पुरा

दाङदेउखुरीको गढवा गाउँपालिका–५ स्थित श्रीमावि चैनपुरमा स्वास्थ्य शिविर

देउखुरी निसराउ समूहले दाङदेउखुरीको गढवा गाउँपालिका–५ स्थित श्रीमावि चैनपुरमा आगामी असोज १५ गते निःशुल्क स्वास्थ्य शिविर गर्दै गरेको सोको सम्पूर्ण तयारी भएको आयोजकले जनाएको छ ।
देउखुरी निसराउ समूहका अध्यक्ष शिव चौधरीका अनुसार दाङदेउखुरीको गढवा गाउँपालिकाले शिविर व्यवस्थापनको आर्थिक पाटोमा सघाइरहेको छ । गढवा गाउँपालिकाका प्रतिनिधि, प्रशासकीय अधिकृत, लेखा अधिकृत , स्वास्थ्य विभागका प्रमुख , थाकसका पदधिकारी, सल्लाहकारहरुसँग विहीबार सौहादपूर्ण छलफल भएको अध्यक्ष चौधरीले बताए ।

शिविरमा हाड जोर्नी विशेषज्ञ डा राजेश कुमार चौधरी, इन्डोक्राइनोलोजिस्ट डा सुनिल चौधरी, स्त्री रोग विशेषज्ञ, जनरल फिजिसियन, आँखा विशेषज्ञ लगायतको सेवा उपलब्ध हुनेछ । साथै, मेडिकल अफिसरहरु डा पुष्पा भुसाल, डा संगम सिंह, डा केदार अधिकारी, डा कौशल गिरी, डा रुविना चौधरी, डा सुदीप चौधरी लगायतले विरामी जाँच गर्नेछन् ।
गढवा गाउँपालिका, फ्लोरेन्स हस्पिटल, ट्रमा सेन्टर, लमही आँखा अस्पताल, नोभा केयर फिजियो थेरापीको सहकार्य तथा थारु कल्याणकारिणी सभा, गढवाको सहआयोजनामा कार्यक्रम भैरहेको छ ।

शिविरको सुमद्घाटन सहरी विकास मन्त्री मेटमणि चौधरीले गर्नेछन् । शिविरलाई विभिन्न तवरबाट सहयोग गरिने लुम्बिनी प्रदेशका स्वास्थ्य मन्त्री इन्द्रजीत चौधरीले बताए ।
२०७० सालमा स्थापित निसराउ समूहले यसअघि देउखुरीमा हाफ म्याराथुनको आयोजना, थारु साहित्यिक कार्यक्रम, कोभिडको समयमा राहत वितरण, बाढी पीडितहरुलाई सहयोग, लमहीमा अक्सिजन प्लान्ट स्थापनामा सहयोग लगायत सामाजिक कार्यमा सहभागिता जनाएको छ ।