जब रामप्रसाद चौधरीको कुशको लाश बनाएर सद्गत गरियो...
१४४९ दिन अगाडि
|
३० भदौ २०७९
कुशको बाबु बनायो, कुशकै आमा बनायो
मन्त्र पढायो, अभिषेक चढायो
मान्यो, वर्षौ अघि घरबाट निस्किगएका,
ती उसकै साक्षात बाआमा हुन्
कुशको बुख्याचामा प्राण भरेर
भूत भएका बाआमालाई फेरि मार्नु छ
सद्गत गर्नु छ, श्राद्ध गर्नु छ,
पिण्ड दिनु छ, तर्पण चढाउनु छ,
वैतरणी तरउनु छ र स्वर्ग पठाउनु छ ।
आख्यानकार रामलाल जोशीका बाआमा आख्यानबाट लिइएको यी कविताका पंक्तिझैं रामप्रसाद चौधरीका छोरीहरुको अवस्था थियो भदौ २७ गते ।
बर्दियाको बारबर्दिया नगरपालिका–५, मगरागाडी गाउँका दुई दशकदेखि बेपत्ता शिक्षक रामप्रसाद चौधरी अब नआउने ठानेर उनका छोरीहरुले कुशको बाबु बनाइ सोमबार अन्त्येष्टि गरे ।
उनका परिवारका अनुसार बेपत्ता शिक्षक चौधरीलाई तत्कालीन शाही नेपाली सेनाले बीस वर्ष अघि बेपत्ता बनाएका थिए । बीस वर्षसम्म पनि नफर्किएपछि मृतक ठानी सोमबार उनको कुशको शव बनाई अन्त्येष्टि गरिएको हो ।
शिक्षक रामप्रसादको खोजी गरिदिन बारम्बार अनुरोध गर्दा पनि सरकारले उल्टो सहिद भयो भन्दै १० लाख रुपैयाँ थमाइदिएको परिवारको आरोप छ ।
अब तिम्रो श्रीमान कुनै पनि हालतमा घर नफर्किने कुरामा विश्वास गर्न परिवारले दबाब दिएका कारण अन्तिम काजकिरिया गरेको श्रीमती संगीता चौधरी सुनाउँछिन् ।
२०५९ साल भदौ १७ गते घरमै सुतिरहेका रामप्रसादलाई नेपाली सेनाको टोलीले पक्राउ गरेर लगेको थियो । रामप्रसाद गाउँमै रहेको बाल शिक्षा कक्षा पढाउने शिक्षक थिए ।
सोमबार अन्त्येष्टि गरिएका रामप्रसादका तीन छोरीहरू थारु संस्कारअनुसार बाबुको काजकिरियामा बसेका छन् ।
द्वन्द्वकालमा सबैभन्दा बढी बर्दियाबाट वेपत्ता पारिएका छन्, जो प्रायः थारु समुदायका छन् ।
सबै तस्विरः भागीराम चौधरी
